Bydd holl Aelodau’r Senedd yn cael dychwelyd i Fae Caerdydd er mwyn cyfarfod wyneb yn wyneb o 1 Fawrth os ydyn nhw’n dymuno.
Dyma’r tro cyntaf i’r holl aelodau gael eu gwahodd yn ôl i’r Senedd ers mis Mawrth 2020, ac mae’r Senedd wedi bod yn cyfarfod yn gwbl rithiol neu’n hybrid dros y ddwy flynedd ddiwethaf.
Ar hyn o bryd mae’r cyfarfodydd hybrid yn caniatáu i ychydig o aelodau i gwrdd yn y cnawd, gyda’r gweddill yn cyfrannu drwy alwad fideo, ond gallai rhai gwleidyddion barhau i weithio o bell ar ôl Dydd Gŵyl Dewi.
Fe rybuddiwyd Aelodau oedd yn cyfarfod wyneb yn wyneb i wisgo gorchudd yn y siambr, ynghyd â gwneud profion llif unffordd.
Bydd sesiynau rhithiol yn parhau tan gwyliau’r Pasg, o leiaf.
Dywedodd llefarydd ar ran y Senedd: “O ddydd Mawrth, Mawrth y 1af bydd pob un o’r 60 Aelod yn cael cyfle i ddychwelyd i siambr y Senedd ar gyfer y Cyfarfod Llawn.
“Bydd y model hybrid yn parhau yn ei le, sy’n rhoi’r opsiwn i aelodau gymryd rhan fwy neu lai os dymunant.”
Dywedodd y Senedd fod y cam wedi’i gymeradwyo gan y Llywydd Elin Jones, mewn ymgynghoriad ag uwch Aelodau o’r Senedd sydd ar bwyllgor busnes Senedd Cymru, wedi iddyn nhw gynnal asesiad risg.
Mae’r Ceidwadwyr Cymreig wedi galw ers tro am adalw’r holl aelodau i’r Senedd.
Fis diwethaf fe ddadleuodd Darren Millar, Aelod Ceidwadol o’r Senedd dros Orllewin Clwyd bod y fformat hybrid “yn caniatáu craffu mwy effeithiol ar weinidogion, nad ydyn nhw’n gallu dibynnu ar swyddogion ac ymgynghorwyr sy’n darparu cymorth ac awgrymiadau oddi ar y sgrin, fel sy’n digwydd mewn rhith-bresenoldeb yn siambr y Senedd.”
Daeth sesiynau hybrid i ben yn Senedd San Steffan haf y llynedd.
Digwyddiadau cofiadwy
Mae’r sesiynau wedi hybrid wedi creu atgofion da a drwg ar lawr y siambr, gan gynnwys pan gafodd Gweinidog yr Economi, Vaughan Gething, ei ddal yn rhegi am ei gyd-Aelod Cynulliad, Jenny Rathbone, ar ôl iddo anghofio troi’r meicroffon ar ei gyfrifiadur i ffwrdd.
Cafwyd moment hanesyddol pan gynhaliodd Mark Drakeford sesiwn o Gwestiynau’r Prif Weinidog am y tro cyntaf y tu allan o Gymru drwy gyswllt fideo o Gynhadledd COP26 yng Nglasgow.
Bu’n rhaid i’r Llywydd ganiatáu seibiant am ychydig funudau ar ôl i’r Siambr golli cyswllt gyda’r Prif Weinidog.
Roedd clywed y Llywydd, Elin Jones yn canu ‘Hei Mistar Urdd’ ar ganmlwyddiant y mudiad yn foment gofiadwy, a rhybuddiodd y byddai hi wedi gofyn i’r holl Aelodau gyd-ganu â hi pe bai’r Senedd wedi cwrdd wyneb yn wyneb.
??????? Agorodd @yLlywydd y Cyfarfod Llawn heddiw gyda neges arbennig i’r @Urdd, sy'n dathlu ei chanmlwyddiant.
Penbwlydd Hapus Mawr!???? pic.twitter.com/kRuHCaeX4Q
— Senedd Cymru (@SeneddCymru) January 25, 2022
Fe gyhoeddodd Senedd Cymru fideo o’r digwyddiad ar Twitter:
“Agorodd @yLlywydd y Cyfarfod Llawn heddiw gyda neges arbennig i’r @Urdd, sy’n dathlu ei chanmlwyddiant.
“Penblwydd Hapus Mawr!”
Bydd Senedd Cymru cymryd gwyliau hanner tymor yr wythnos nesaf.
Darllen mwy
Galw am ddod â sesiynau rhithiol yn y Senedd i ben
❝ Democratiaeth ‘rithiol’ dan y lach
Aelodau o’r Senedd yn dychwelyd i “Siambr hybrid” yng Nghaerdydd
Symud i fodel Senedd ‘Hybrid’
