Bydd cyfyngiadau newydd yn dod i rym yng Nghymru am chwech heno, (Rhagfyr 4), er mwyn atal lledaeniad y coronafeirws.
Bydd rhaid i dafarndai, bariau, bwytai a chaffis gau am chwech yr hwyr, a fyddan nhw ddim yn cael gweini alcohol – ond bydd hawl ganddynt ddarparu gwasanaeth tecawê drwy’r dydd ac ar ôl 6yh.
Bydd rhaid i sinemâu, canolfannau bowlio deg ac atyniadau ymwelwyr dan do fel amgueddfeydd gau yn llwyr.
Ond mi fydd atyniadau awyr agored a gwasanaethau nad ydyn nhw’n hanfodol, gan gynnwys siopau, siopau trin gwallt, a chanolfannau hamdden, yn aros ar agor.
‘Dryswch’
Bu peth dryswch yn dilyn y cyhoeddiad ynghylch a fydd tafarndai, bwytai a chaffis yn cael gwerthu alcohol.
Cadarnhaodd llefarydd ar ran Llywodraeth Cymru golwg360 y bydd modd i leoliadau sydd â thrwydded i werthu alcohol oddi ar y safle barhau i wneud hynny tan 10yh.
Mae sawl tafarn wedi penderfynu cau eu drysau yn sgil y cyhoeddiad, gan ddweud bod y costau rhedeg yn gorlethu’r manteision o agor heb gwrw, ac mae Mark Drakeford wedi’i gyhuddo o anwybyddu arweinwyr lletygarwch.
Fodd bynnag, wrth gyhoeddi’r cyfyngiadau newydd ddechrau’r wythnos, dywedodd Mark Drakeford fod rhaid ymateb nawr.
“Oni bai ein bod yn ymateb nawr i’r nifer cynyddol o bobol sydd wedi’u heintio â’r feirws, gallai cyfanswm nifer y bobol â coronafeirws yn yr ysbyty yng Nghymru godi i 2,200 erbyn Ionawr 12,” meddai.
Ochr yn ochr â’r cyfyngiadau newydd mae Llywodraeth Cymru hefyd wedi cyhoeddi pecyn cymorth gwerth £340m i gefnogi’r diwydiant lletygarwch.
Mae arweinydd y Ceidwadwyr Cymreig Paul Davies, yn dweud bod cyfyngiadau cenedlaethol yn annheg i ardaloedd â chyfraddau isel o’r haint.
