Jonny Clayton yw pencampwr Uwch Gynghrair Dartiau’r PDC.

Curodd e Jose de Sousa o Bortiwgal o 11-5 yn rownd derfynol ym Milton Keynes i sicrhau y bydd e’n cael cystadlu eto y flwyddyn nesaf.

“Mae Cymru ar y map, mae fy mhentref bach Pontyberem ar y map,” meddai’r Cymro Cymraeg ar Sky Sports ar ôl ennill.

Curodd e’r Iseldirwr Michael van Gerwen o 10-8 yn y rownd gyn-derfynol.

Roed van Gerwen yn mynd am chweched tlws yn y gystadleuaeth, ond roedd gan y Cymro gyfartaledd o 103 wrth sicrhau ei le yn y ffeinal ar ôl bod ar ei hôl hi o 8-7 cyn ennill y tair gêm olaf.

Yr Iseldirwr oedd ar frig y tabl am yr wythfed tro mewn naw mlynedd, ond dyma’r tro cyntaf iddo fe golli yn y rownd gyn-derfynol.

Cyrhaeddodd de Sousa y ffeinal ar ôl curo Nathan Aspinall o 10-9.

Collodd Clayton y gêm gyntaf ond fe aeth yn ei flaen wedyn i fynd ar y blaen o 6-3.

Tarodd de Sousa ’nôl i 7-5 ond adeiladodd y Cymro gryn fomentwm wrth ennill pedair gêm o’r bron cyn cipio’r tlws.

Dyma’r tro cyntaf i Gymro ennill y gystadleuaeth, a’r tro cyntaf hefyd i’r chwaraewr wnaeth orffen yn bedwerydd yn y tabl ei hennill hi.

Yn ogystal â’r tlws, mae e wedi ennill £250,000 bedwar mis yn unig ar ôl ennill y Meistri.

Dyma’i bedwerydd tlws y tymor hwn, a hynny ar ôl iddo fe a Gerwyn Price ennill Cwpan y Byd dros Gymru.

Ymateb

“Hollol ryfeddol,” oedd ei ymateb wrth siarad â Sky Sports ar ôl y gêm.

“Diolch i bawb sy’n credu ynof fi, mae’n golygu cymaint.

“Dw i’n dal yn ôl yn y gwaith ddydd Llun!

“Mae’n hollol anhygoel.

“Dw i’n caru’r gêm, dw i’n ddiog wrth ymarfer ond ar ddiwedd y dydd, pan dw i’n dod i’r llwyfan, dw i’n trio fy ngorau glas.”

Jonny Clayton
Chwaraeon Eraill

Buddugoliaeth fawr i Jonny Clayton dros Gary Anderson

Y Cymro Cymraeg wedi ennill saith gêm o’r bron i ennill yr ornest yn erbyn yr Albanwr
Chwaraeon Eraill

Pwynt i Jonny Clayton ar noson gynta’r Uwch Gynghrair Dartiau

Doedd y Cymro arall, Gerwyn Price ddim yn chwarae ar ôl profi’n bositif am Covid-19
golwg+
Chwaraeon Eraill

Y plastrwr sy’n dywysog y dartiau

Alun Rhys Chivers

Mae Jonny Clayton yn ddyn ei filltir sgwâr, yn Gymro i’r carn, yn blastrwr… ac yn un o chwaraewyr dartiau gorau’r byd
Jonny Clayton
Chwaraeon Eraill

Jonny Clayton, y Cymro Cymraeg o Bontyberem, yn Feistr y byd dartiau

Fe wnaeth y gŵr o Sir Gaerfyrddin guro Mervyn King o 11-8 yn y ffeinal ym Milton Keynes