Bydd gofyn i unrhyw un sy’n ceisio am drwydded gynnau gael profion meddygol o dan ganllawiau statudol newydd.
Mae’r mesurau newydd wedi eu cyflwyno gan yr Ysgrifennydd Gwladol Priti Patel yn sgil y gyflafan yn Plymouth wythnos diwethaf.
Bydd rhaid i ddoctoriaid sefydlu a oes gan ymgeiswyr gynnau unrhyw “gyflyrau meddygol perthnasol,” sy’n cynnwys cyflyrau iechyd meddwl, a datgan hynny i’r heddlu.
Roedd Llywodraeth y Deyrnas Unedig eisoes wedi dweud dros y penwythnos y byddai’n rhaid gwirio cyfrifon cyfryngau cymdeithasol holl ymgeiswyr gynnau yng Nghymru a Lloegr.
‘Gwersi wedi eu dysgu’
Mewn datganiad ysgrifenedig i Senedd Prydain, dywedodd Priti Patel bod y canllawiau newydd yn dangos bod “gwersi wedi eu dysgu” a bod angen “gwell cysondeb” ar draws adrannau trwyddedu gynnau.
“Bydd hyn yn golygu bod neb yn cael trwydded gynnau oni bai bod meddyg wedi datgan i’r heddlu a oes ganddyn nhw unrhyw gyflyrau meddygol perthnasol neu beidio,” meddai.
“Mae hynny’n cynnwys asesiad o’u hiechyd meddwl, a bydd y canllawiau hefyd yn nodi y gall rhywun wirio cyfryngau cymdeithasol ymgeiswyr gynnau.
“Bydd gan yr heddlu ddyletswydd gyfreithiol i ystyried y canllawiau statudol newydd pan fyddan nhw’n cael eu cyhoeddi.
“Rhaid i ni wneud popeth o fewn ein gallu i osgoi rhywbeth fel hyn rhag digwydd eto.
“Mae gan y Deyrnas Unedig rai o’r deddfwriaethau llymaf ar reoli gynnau yn y byd a lefelau cymharol isel o droseddau gynnau.
“Ac eto, er bod trasiedïau fel yr un dydd Iau diwethaf yn brin, mae eu heffaith yn ddwys.
“Rydyn ni bob amser yn asesu pa gamau y gallwn ni eu cymryd i helpu i atal cyflafan mor ofnadwy rhag digwydd.”
Cwest yn agor
Mae crwner wedi agor cwest i farwolaethau’r chwe pherson a fu farw yn y gyflafan yn Plymouth.
Bydd Ian Arrow, yr uwch grwner yn yr ardal, yn agor gwrandawiadau yn swyddogol i farwolaethau Maxine Davison, 51, Sophie Martyn, 3, Lee Martyn, 43, Stephen Washington, 59, a Kate Shepherd, 66.
Bydd gwrandawiad ar wahân yn cael ei agor i farwolaeth y llofrudd Jake Davison, 23.
Dywedodd llefarydd ar ran y crwner y bydd Mr Arrow hefyd yn derbyn tystiolaeth gan Heddlu Dyfnaint a Chernyw.
