Cymdeithas yr Iaith yw’r diweddaraf i feirniadu cynlluniau Prifysgol Bangor i wneud toriadau i nifer o adrannau’r Brifysgol, gan gynnwys yr Adran Gymraeg.
Mae’r Brifysgol yn bwriadu gwneud newidiadau i’r Coleg Gwyddorau Dynol, Coleg Gwyddorau Amgylcheddol a Pheirianneg, a Choleg y Celfyddydau, Dadwainiant a Busnes er mwyn gwneud arbedion o £13m.
Rhybuddia Toni Schiavone, Cadeirydd Grŵp Addysg Cymdeithas yr Iaith, y gallai’r toriadau fod yn ergyd i enw da’r Adran Gymraeg.
“Byddai toriadau i’r Adran Gymraeg yn cael effaith ddinistriol ar ddarpariaeth y Brifysgol o gyrsiau Cymraeg is-raddedig a graddedig,” meddai.
“Adnabyddir y Brifysgol fel un o brif ganolfannau Cymraeg fel pwnc addysg uwch y byd, ac fe fyddai toriadau o’r math hyn yn ergyd enfawr i’r enw da haeddiannol hwn.
“Byddai cyflwyno’r toriadau hyn yn weithred gwbl fyrbwyll a niweidiol i’r Brifysgol, yr iaith a’r gymuned ehangach.
“Cydsafwn â myfyrwyr, cyn-fyfyrwyr, staff ac undeb UCU yn eu gwrthwynebiad i gynlluniau Prifysgol Bangor.”
Coleg y Celfyddydau, Dyniaethau a Busnes sydd wedi’i daro waethaf gan y toriadau a’r ailstrwythuro – mae 30 o swyddi llawn amser yn y fantol yno gan gynnwys un ym maes Cymraeg a Llenyddiaeth Fodern a Chyfoes ac un ym maes Cymraeg a Llenyddiaeth yr Oesoedd Canol.
‘Dim ond mis o rybudd yn gwbl warthus’
Mae Prifysgol Bangor wedi dechrau ar gyfnod ymgynghori ac mae gan staff a myfyrwyr tan Dachwedd 15 i ymateb.
Ond dydy hyn ddim yn ddigon da yn ôl un myfyriwr sy’n rhan o ymgyrch Cymdeithas yr Iaith.
“Nid yw’r Brifysgol wedi rhoi lawer o rybudd i ni fyfyrwyr i ymateb i’w hymgynghoriad – dim ond mis o rybudd, sy’n gwbl warthus, yn enwedig o ystyried eu difrifoldeb,” meddai.
“Mae’n bosib fod y Brifysgol yn ceisio cymryd mantais o ddryswch y sefyllfa bresennol i weithredu cynlluniau dadleuol yn ddiwrthwynebiad, heb ymgynghori’n ddigonol.”
Mae 750 wedi llofnodi deiseb gan Undeb Myfyrwyr Prifysgol Bangor yn gwrthwynebu’r newidiadau.
Darllen mwy:
- Diswyddiadau yn “ergyd enfawr i’r ardal,” meddai Siân Gwenllian
- Dogfen fewnol yn dangos y gall yr ailstrwythuro effeithio ar addysg a gwneud cyrsiau yn “llai deniadol”
- Archdderwydd Cymru yn lgaw ar Brifysgol Bangor i beidio symud rhai o swyddogaethau Canolfan Bedwyr a “chwalu’r pwerdy iaith arloesol”.
- Gweinidog y Gymraeg yn trafod dyfodol Canolfan Bedwyr
- “Morâl staff yn anhygoel o isel” ym Mhrifysgol Bangor yn ôl undebau staff.
