Y Theatr Genedlaethol yn newid yn ‘Theatr Cymru’

Fydd dim modd dweud ‘y Theatr Gen’ ragor, er mai dyna’r enw sydd wedi cydio ar lafar am gwmni Theatr Genedlaethol Cymru.

Heddiw (dydd Mercher, Tachwedd 20), mae’r cwmni’n ail-frandio’i hun yn ‘Theatr Cymru’ – enw a brand newydd sy’n cynrychioli eu “hymrwymiad i fod yn gwmni theatr i Gymru gyfan ac i roi’r genedl a’i phobol wrth galon eu gwaith”.

Hefyd, mae newyddion am arlwy’r cwmni ar gyfer 2025.

Bydd Theatr Cymru yn cyflwyno chwe chynhyrchiad yn 2025.

Yn ogystal â dramâu newydd gan Mared Jarman a Tudur Owen, bydd taith o fonolog Bethan Marlow, Brên. Calon. Fi., gafodd ei gweld yn Eisteddfodau Ceredigion a Phontypridd.

Yn yr hydref, bydd y cwmni’n cyflwyno clasur Shakespeare, Romeo a Juliet “ar ei newydd wedd”, a hefyd yn cynnal prosiectau cymunedol.

Bydd cyfle i bobol wylio cynyrchiadau’r cwmni o’u cartref ar S4C a BBC iPlayer am y tro cyntaf hefyd.

Dyma gynyrchiadau Theatr Cymru yn 2025:

Byth Bythoedd Amen gan Mared Jarman – ar daith yn Ionawr a Chwefror 2025
Huw Fyw gan Tudur Owen – ar daith ym mis Mai 2025
Brên. Calon. Fi gan Bethan Marlow – ar daith ym mis Mehefin 2025
Wrecslam! – Eisteddfod Wrecsam 2025
Romeo a Juliet – ym mis Hydref 2025
Sioe Nadolig (i’w chyhoeddi) – Rhagfyr 2025

Daw’r newyddion wrth i’r cwmni baratoi at fynd ar daith fory (dydd Iau, Tachwedd 21) â’u sioe theatr i blant, Dawns y Ceirw gyda’r cerddor Casi Wyn.

Cydweithio ar y brand

Mae’r cwmni wedi gweithio gyda chwmni o’r end Uned Studio wrth ailddatblygu’r brand.

“Rydyn ni’n falch o allu lansio’r brand ac enw newydd, sy’n teimlo’n fwy triw i weledigaeth bresennol y cwmni ac yn cyfleu ein hawydd ni i fod yn groesawgar a chynhwysol,” meddai Angharad Jones Leefe, Cyfarwyddwr Gweithredol y cwmni,

“Dyma enw sy’n cynrychioli’n glir ein hunaniaeth a’n pwrpas, ac sy’n cyfleu ein hangerdd dros fod yn llwyfan i wneuthurwyr a gweithwyr theatr anhygoel Cymru.

“Mewn blwyddyn lle rydyn ni wedi gweld ein cynulleidfaoedd yn dychwelyd i lefel cyn-Covid am y tro cyntaf, rydyn ni’n hyderus o adeiladu ar hyn gyda’r rhaglen waith uchelgeisiol yma ac yn edrych ymlaen at groesawu cynulleidfaoedd ledled Cymru i’r cynyrchiadau yma.”

Drama gyntaf Tudur Owen

Cynhyrchiad cyntaf y cwmni yn 2025 fydd drama newydd gan Mared Jarman, Byth Bythoedd Amen, rhwng Ionawr 25 a Chwefror 13.

Bydd y ddrama “ddinesig, ddoniol a thywyll” yn trafod themâu fel “cariad, colled a bywyd fel pobol anabl mewn byd sy’n blaenoriaethu’r brif ffrwd”.

Fis Mai, bydd y cwmni yn cyflwyno drama lwyfan gyntaf Tudur Owen, Huw Fyw, gyda Steffan Donnelly, Cyfarwyddwr Artistig Theatr Cymru, yn cyfarwyddo.

Tudur ei hun fydd yn y brif ran, sef Huw, yr hen filwr blin sy’n cael tro ar fyd ar ôl cael profiad lwcus.

Bydd y ddrama grafog yn edrych ar sut i fyw yn y presennol, gan ddal gafael yn dynn ar y gorffennol.

Mae’r cynhyrchiad yn cyd-daro ag 80 mlynedd ers diwedd yr Ail Ryfel Byd.

Yn yr hydref, fe fydd y cwmni’n mynd i’r afael â Romeo a Juliet gan William Shakespeare – addasiad Cymraeg J T Jones.

Bydd y cynhyrchiad “yn plethu’r Gymraeg a’r Saesneg, gan osod y ffrae ffyrnig rhwng y teuluoedd Montague a Capulet yng nghymdeithas ddwyieithog Cymru, ac yn archwilio eithafoedd angerdd ac anrhefn”.

Bydd rhaglen o weithdai yn seiliedig ar y cynhyrchiad ar gael i ysgolion.

Dawns y Ceirw

Dyma ddyddiadau taith Dawns y Ceirw, sioe i blant pump i naw oed a’u teuluoedd gan Casi Wyn, am garw bach sy’n mentro yn bell o’i gartref yn y goedwig: