Mae S4C yn dweud eu bod nhw’n “siomedig” yn dilyn y cyhoeddiad am bartneriaeth newydd rhwng UEFA a gwasanaeth newydd Viaplay am bedair blynedd i ddangos o leiaf 40 o gemau pêl-droed yn fyw, gan gynnwys gemau Cymru.
Bydd y bartneriaeth yn dechrau yn 2024, ac yn cwmpasu gemau rhagbrofol Ewro 2028 a Chwpan y Byd 2026 fydd i’w gweld yn ecsgliwsif ar Viaplay, ynghyd â gemau Cynghrair y Cenhedloedd 2024-25 a 2026-27 a gemau cyfeillgar.
Daw’r cytundeb fel rhan o gyfrifoldeb UEFA am farchnata a gwerthu hawliau darlledu’r gwledydd sy’n aelodau, ac fe fydd yn sicrhau swm o arian i Gymdeithas Bêl-droed Cymru i’w wario ar bob lefel o’r gêm yng Nghymru.
Bydd Viaplay yn cael ei lansio yn ystod ail hanner eleni, gyda sylwebaeth fyw a chynnwys gwreiddiol arall, ac mae disgwyl cyhoeddiad maes o law am y cynnwys fydd ar gael yn y Deyrnas Unedig, y pris a’r dyddiad lansio swyddogol.
Sylwebaeth Gymraeg
Mae gan Viaplay ac UEFA bartneriaeth hirdymor yn Ewrop, ac wrth gyhoeddi’r bartneriaeth newydd hon, maen nhw wedi ymrwymo i sicrhau sylwebaeth Gymraeg.
Ond mae yna amheuon yn sgil y bartneriaeth am hawl S4C i barhau i ddarlledu gemau Cymru.
“Yn amlwg, mae S4C yn siomedig gyda’r newyddion yma gan UEFA heddiw,” meddai llefarydd ar ran y sianel.
“Mae S4C yn trafod gyda Chymdeithas Bêl-droed Cymru er mwyn cadarnhau’r sefyllfa o ran sylwebaeth Gymraeg.”
Ar Twitter, mae Noel Mooney, prif weithredwr y Gymdeithas Bêl-droed, yn dweud bod “trafodaethau ar y gweill” ynghylch sylwebaeth Gymraeg.
“Bore da. Mae UEFA yn gwerthu’r hawliau canolog ar gyfer pob un o’r 55 cymdeithas genedlaethol yn Ewrop,” meddai.
“Rydyn ni mewn trafodaethau gyda nhw o ran yr iaith Gymraeg, hyrwyddo’r gêm ddomestig yn rhyngwladol, gemau timau cenedlaethol @Cymru i’w gwylio’n rhad ac am ddim a.y.b.
“Byddwn yn diweddaru cyn gynted â phosib.”
“Heb y gemau rhyngwladol, does dim Undeb Rygbi Cymru”
‘Ni fydd y Gymraeg yn cael ei heffeithio’ wrth ddarlledu’r gemau ar Amazon – Undeb Rygbi Cymru
‘Dylai holl gemau rhyngwladol Cymru gael eu dangos am ddim ar y teledu’
Amazon yn bygwth cystadlu yn erbyn sylwebaeth rygbi S4C, yn ôl adroddiadau
