Bydd tîm pêl-droed menywod Cymru’n herio Ffrainc, Lloegr a’r Iseldiroedd yn Ewro 2025.
Byddan nhw’n chwarae yng Ngrŵp B ar ôl cymhwyso ar gyfer twrnament mawr am y tro cyntaf erioed.
16 tîm fydd yn cystadlu am y tlws, gyda phedwar grŵp o bedwar gwlad yr un.
Cymhwysodd y Swistir yn awtomatig gan mai nhw fydd yn cynnal y twrnament, ac hefyd wedi cymhwyso mae Norwy, sydd dan reolaeth Gemma Grainger, rhagflaenydd Rhian Wilkinson, rheolwr presennol Cymru.
Roedd Jess Fishlock, un o sêr Cymru, a’r is-reolwr Jon Grey yn y gynulleidfa yn Lausanne i weld yr enwau’n dod allan o’r het.
Ar gopa’r mynydd 🗻
Our #WEURO2025 group is confirmed 👊#ForHer | #TogetherStronger pic.twitter.com/TGtx0BGJwF
— Wales 🏴 (@Cymru) December 16, 2024
Cymru yn erbyn Lloegr
Bydd Cymru’n herio Lloegr, deiliaid y tlws ar ôl ennill y twrnament diwethaf, yn St Gallen ar Orffennaf 13.
Hon fydd gêm ola’r grwpiau, felly gallai fod yn gêm dyngedfennol.
Byddan nhw hefyd yn herio’r Iseldiroedd, sef y pencampwyr blaenorol, a Ffrainc, oedd wedi cyrraedd rownd gyn-derfynol yr Ewros diwethaf.
Cyn i’r enwau gael eu tynnu o’r het, roedd Jill Scott, chwaraewr Lloegr, yn edrych ymlaen at y posibilrwydd o herio Cymru yn y twrnament.
“Mae hi mor arbennig,” meddai wrth y BBC am gemau rhwng y ddwy wlad.
“Roeddwn i mor hapus drostyn nhw pan wnaethon nhw gymhwyso.
“Dw i’n siŵr fod yna lawer o gefnogwyr Cymru sydd wedi cyffroi i gael gweld pwy fyddan nhw’n eu hwynebu.
“Byddai’n wych, ond oni fyddai’n well fel gêm yn y rowndiau terfynol, felly byddwn i wrth fy modd yn eu gweld nhw’n herio’i gilydd,” meddai am Loegr.
“Byddai’n wych i’r cefnogwyr, ond efallai y tu hwnt i’r grwpiau.”
Grŵp A – Y Swistir, Norwy, Gwlad yr Iâ, Y Ffindir
Grŵp B – Sbaen, Portiwgal, Gwlad Belg, Yr Eidal
Grŵp C – Yr Almaen, Gwlad Pwyl, Denmarc, Sweden
Grŵp D – Ffrainc, Lloegr, Cymru, Yr Iseldiroedd