Ottis Gibson, cyn-fowliwr cyflym Morgannwg, yw prif hyfforddwr newydd Clwb Criced Swydd Efrog, ar ôl llofnodi cytundeb tair blynedd.
Fe fu’r dyn 52 oed o India’r Gorllewin yn brif hyfforddwr India’r Gorllewin a De Affrica yn y gorffennol, yn ogystal â bod yn hyfforddwr bowlio Lloegr.
Bydd e’n dechrau yn y swydd ar ddiwedd mis Chwefror ar ôl i’r Pakistan Super League ddod i ben, ac yntau’n gweithio gyda’r Multan Sultans ar hyn o bryd.
Fis diwethaf, cyhoeddodd Swydd Efrog ymadawiadau 16 aelod o staff hyfforddi’r clwb o ganlyniad i’r ymchwiliad i honiadau o hiliaeth yn y sir gan Azeem Rafiq.
Yn eu plith roedd y Cyfarwyddwr Criced Martyn Moxon a’r prif hyfforddwr Andrew Gale.
Darren Gough, cyn-fowliwr cyflym Lloegr a Swydd Efrog, yw rheolwr gyfarwyddwr dros dro’r sir erbyn hyn, a bydd e’n rheolwr llinell ar Ottis Gibson.
Mae disgwyl i ddau is-hyfforddwr gael eu penodi maes o law i gynorthwyo Gibson.
Treuliodd Gibson, sy’n hanu o Barbados, ddau dymor gyda Morgannwg yn 1994 a 1996, ac fe chwaraeodd e i siroedd Durham a Chaerlŷr hefyd.
Cynrychiolodd e India’r Gorllewin mewn dwy gêm brawf a 15 o gemau undydd.
“Dw i’n freintiedig dros ben ac wedi cyffroi o gael y cyfle i ymuno â Chlwb Criced Swydd Efrog yn brif hyfforddwr,” meddai.
“Mae hon yn un o’r swyddi mwyaf breintiedig yng nghriced sirol Lloegr, a dw i wir yn edrych ymlaen at gydweithio â’r grŵp talentog hwn o chwaraewyr i symud y clwb yn ei flaen.
“Dw i wedi siarad yn hir â Goughy ynghylch y cyfeiriad mae’r clwb yn symud iddo, a dw i wedi cyffroi o gael bod yn rhan o’r dyfodol hwnnw.”
Rhagor am helynt hiliaeth Swydd Efrog:
Argymell atal arian cyhoeddus i griced oni bai bod yr awdurdodau’n mynd i’r afael â hiliaeth
Swydd Efrog “wedi gwneud digon” i gael criced rhyngwladol yn ôl, medd Azeem Rafiq
Hyfforddwr dros dro Swydd Efrog yn ymddiheuro am awgrymu y dylid “anghofio” am yr helynt hiliaeth
Clwb Criced Swydd Efrog wedi’i gefeillio gyda thîm o Bacistan ar ôl helynt hiliaeth
Ymchwiliad annibynnol i lywodraethiant Clwb Criced Swydd Efrog
Rhagor am Ottis Gibson:
Cyn-chwaraewr amryddawn Morgannwg yn llygadu prif swydd Lloegr
