Mae trydydd dyn wedi cael ei gyhuddo mewn cysylltiad â llofruddiaeth Tomasz Waga yng Nghaerdydd.
Bydd Mario Qato, 25, o Tottenham yn Llundain, yn ymddangos o flaen Llys Ynadon Caerdydd heddiw (Ebrill 23) ar gyhuddiad o lofruddiaeth.
Mae dau ddyn arall wedi cael eu cyhuddo’n barod mewn cysylltiad â’r llofruddiaeth, ac maen nhw’n cael eu cadw yn y ddalfa nes yr achos llys.
Cafodd corff Tomasz Waga, oedd yn 23 oed, ei ddarganfod ar Ffordd Westville, Penylan, yn hwyr nos Iau, Ionawr 28.
Mae lle i gredu ei fod wedi teithio o Dagenham, Llundain, i Ffordd Casnewydd, Caerdydd lle bu ffrwgwd awr cyn dod o hyd i’w gorff.
Bu farw o ganlyniad i ymosodiad parhaus.
Daeth yr heddlu o hyd i ffatri canabis yn yr adeilad, ac maent yn credu bod ei farwolaeth yn gysylltiedig â throseddu cyfundrefnol.
Llofruddiaeth Caerdydd: £5,000 am wybodaeth am dri dyn
