Mae’r 11,000 o brofion coronafeirws positif sydd wedi’u cyhoeddi heddiw ar ol bod ar goll o ffigyrau swyddogol blaenorol yn dangos “pa mor ddifrifol yw’r sefyllfa,” meddai’r Prif Weinidog Mark Drakeford.

Cyhoeddwyd 11,468 yn rhagor o achosion o’r coronafeirws yng Nghymru heddiw, gan fynd â chyfanswm yr achosion a gadarnhawyd i 114,566.

Nododd Iechyd Cyhoeddus Cymru 52 yn rhagor o farwolaethau, gan fynd â’r cyfanswm yng Nghymru ers dechrau’r pandemig i 2,973.

Dywedodd Iechyd Cyhoeddus Cymru fod yr adroddiad yn cynnwys ôl-adroddiad o tua 11,000 o achosion yn dilyn oedi oherwydd mater technegol.

“Nid problem gyfrifiadurol”

“Mae’r ffigyrau’n dangos pa mor ddifrifol yw’r sefyllfa yma yng Nghymru, ac yn tanlinellu pam y gwnaethom y penderfyniadau ddoe ar gyfer y cyfnod cyn y Nadolig, yn ystod y Nadolig, ac unwaith y bydd y Nadolig ar ben,” meddai Mark Drakeford ar BBC Breakfast yn gynharach heddiwr.

Wrth drafod yr oedi o ran cyhoeddi’r ystadegau, dwedodd nad problem gyfrifiadurol oedd yn gyfrifol am y ffaith bod y profion positif hyn heb eu cyhoeddi.

“Roedd hyn wedi’i gynllunio er mwyn uwchraddio’r system gyfrifiadurol ac nid oes data ar goll,” meddai.

Daw ei sylwadau wedi i Iechyd Cyhoeddus Cymru gyfaddef y gallai nifer y profion positif yn ystod yr wythnos ddiwethaf fod ddwywaith yn uwch na’r disgwyl.

Eglurodd y Prif Weinidog fod pob prawf positif yng Nghymru wedi eu cofnodi ac wedi eu lanlwytho i’r system olrhain cyswllt.

“Roedd y Llywodraeth yn ymwybodol nad oedd profion yn cael eu llwytho i’r system”, meddai.

“Roeddem yn gwybod bod y niferoedd yn is – roeddem wedi dweud hynny drwy’r wythnos – felly nid yw hyn yn syndod i ni.

“Ond mae’r ffigurau’n dangos pa mor ddifrifol yw’r sefyllfa yng Nghymru erbyn hyn ac yn dangos pam ein bod wedi penderfynu cyflwyno rhagor o gyfyngiadau wedi’r Nadolig.”

Ni gyhoeddodd Iechyd Cyhoeddus Cymru eu ffigurau coronafeirws dros y penwythnos oherwydd “gwaith cynnal a chadw”

Y Gwasanaeth Iechyd dan bwysau cynyddol

Ychwanegodd y Prif Weinidog fod y cynnydd mewn achosion yn rhoi pwysau cynyddol ar y Gwasanaeth Iechyd.

“Mae Cymru’n barod, ond mae’r effaith mae’r coronafeirws yn ei gael ar allu’r Gwasanaeth Iechyd i wneud yr holl bethau eraill roedden ni eisiau eu gwneud i’w weld yn barod.

“Mae gennym 2,100 o bobol mewn gwelyau ysbyty heddiw yng Nghymru sy’n dioddef o’r coronafeirws – mae hynny’r un fath â phum ysbyty ranbarthol llawn.

“Pan mae gennych bwysau yn y system mae’n ei gwneud yn anodd iawn i’r gwasanaeth iechyd wneud popeth arall.”

‘Amserol a chadarn’

Serch hynny mae’r gwrthbleidiau yn dweud bod y digwyddiad yn ddifrifol ac yn cyhuddo Llywodraeth Cymru o “golli rheolaeth ar y firws yng Nghymru”.

Dywedodd llefarydd iechyd Plaid Cymru: “Gydag achosion cadarnhaol yng Nghymru yn codi i’r lefelau uchaf erioed mae’n hanfodol bod adrodd data yn amserol ac yn gadarn,” meddai Rhun ap Iorwerth, wrth y BBC.

“Mae’r cyhoedd yn haeddu darlun cyflawn a chyfredol o’r sefyllfa er mwyn dangos difrifoldeb yr hyn rydym yn ei wynebu.

“Rydym angen sicrwydd brys bod y methiannau hyn wedi cael sylw.”

Mae Helen Mary Jones, Gweinidog Cysgodol yr Economi, hefyd wedi dweud ei bod yn petruso bod Llywodraeth Cymru wedi “colli rheolaeth dros y sefyllfa”.

Ac yn ol Andrew RT Davies, llefarydd iechyd y Ceidwadwyr Cymreig mae Llafur Cymru a’u gweinidog iechyd “yn amlwg wedi colli rheolaeth ar y feirws yng Nghymru.”

“Mae’r data yma yn syfrdanol ac yn dangos diffyg rheolaeth y Gweinidog Iechyd o argyfwng Covid, mae’n ychwanegu at yr 13,000 o lythyrau ynysu anfonwyd drwy gamgymeriad a’r 18,000 o ddata personol a gafodd ei ryddhau ym mis Medi.

“Mae Iechyd Cyhoeddus Cymru yn galw’r llanast yma yn ’danadrodd sylweddol’ – dydy hynny ddim yn dangos difrifoldeb y broblem.”