Yn ôl Helen Mary Jones, Gweinidog Cysgodol Plaid Cymru dros yr Economi, mae Llywodraeth Cymru wedi “colli rheolaeth dros y sefyllfa” yn ymwneud â Covid-19.
“Mae’r saga data diweddaraf yn dangos bod y sefyllfa’n llawer gwaeth na’r disgwyl,” meddai.
“Rhaid cyflwyno cyfyngiadau llymach yn gynharach mewn ardaloedd sydd wedi cyrraedd trothwy Lefel 4.
“Rwy’n ofni bod Llywodraeth Cymru yn colli rheolaeth ar y sefyllfa.”
Galw am ragor o gymorth
Mae Plaid Cymru hefyd wedi galw am fwy o gymorth ariannol a llety ynysu i alluogi pobol hunanynysu’n ddiogel.
“Nid cyfyngiadau yn unig yw’r ateb,” ychwanegodd Helen Mary Jones.
“Rhaid profi, olrhain, cefnogi ac ynysu – rhaid i’r cwbl gyd weithio gyda’i gilydd.
“Mae angen annog pobol i hunanynysu lle bo angen gyda mwy o gymorth ariannol a llety ynysu.
“Mae angen i fusnesau sy’n cael eu gorfodi i gau gael cefnogaeth lawn ac mae angen cynnydd sylweddol yn faint o gysylltiadau agos mae’r system brofi ac olrhain yn eu cyrraedd o fewn 24 awr.
“Y diffyg strategaeth a negeseuon clir yma sy’n gweld hygrededd y Llywodraeth yn dirywio ac mae’n ei chael hi’n anodd dwyn perswad â’r y cyhoedd fwy fwy bob dydd.”
