Yn sgil y pryderon ynglŷn â chynnydd mewn achosion Covid-19 mae’r Llyfrgell Genedlaethol wedi penderfynu cau i’r cyhoedd unwaith eto.
Eglurodd Pedr ap Llwyd, Prif Weithredwr Llyfrgell Genedlaethol Cymru, ar gyfryngau cymdeithasol i’r penderfyniad gael ei wneud er lles y cyhoedd.
Bydd y llyfrgell yn cau ei drysau nos Fercher, Rhagfyr 16, ac yn parhau ar gau tan o leiaf fis Chwefror y flwyddyn nesaf.
- Bu rhaid i’r Llyfrgell gau yn wreiddiol ym Mis Mawrth oherwydd y pandemig.
- Ail agorwyd un o’i hystafelloedd darllen ym mis Medi.
Blwyddyn anodd
Daw’r penderfyniad ar ddiwedd blwyddyn anodd i’r Llyfrgell Genedlaethol.
Fis yn ôl, fe wnaeth Pedr ap Llwyd ddisgrifio cyflwr ariannol y Llyfrgell, a’i pherthynas â Llywodraeth Cymru fel sefyllfa “hollol anghynaladwy”.
Roedd hyn yn dilyn adroddiad annibynnol a gomisiynwyd gan Lywodraeth Cymru i sefyllfa’r Llyfrgell cyn argyfwng y coronafeirws.
Mae’r adroddiad yn dweud bod incwm y Llyfrgell wedi cwympo 40% – mewn termau real – rhwng 2008 a 2019.
Wrth siarad gerbron Pwyllgor Diwylliant, y Gymraeg a Chyfathrebu dywedodd bod dyfodol y llyfrgell yn ddibynnol ar barodrwydd y Llywodraeth i roi “sylw brys” i ofynion ariannol y sefydliad.
Er lles pawb, rwyf wedi gorfod gwneud y penderfyniad anorfod i gau’r Llyfrgell Genedlaethol i ddarllenwyr o nos Fercher yma ymlaen. Mae’r cynnydd mewn achosion o Covid-19 wedi’m gorfodi i wneud hynny. pic.twitter.com/mlOQP1u1KA
— Pedr ap Llwyd (@yrynadllwyd) December 15, 2020
Swyddi yn y fantol
Bu David Michael, Dirprwy Brif Weithredwr y Llyfrgell, hefyd yn rhoi diweddariad o’r sefyllfa gerbron Pwyllgor Diwylliant, y Gymraeg a Chyfathrebu fis Tachwedd.
Dywedodd bod niferoedd staff wedi disgyn o tua 300, i tua 225, ac y byddai angen cwtogi 30 yn rhagor dros y 12 mis nesa’ er mwyn sicrhau cyllideb gytbwys.
Er mwyn osgoi gorfod gwneud y fath doriadau byddai angen “o leiaf £1.5m yn rhagor ar gyfer refeniw gwaelodol”, meddai.
