Cafodd mwy o bobl eu diswyddo rhwng mis Awst a mis Hydref nag ar unrhyw adeg ar gofnod wrth i bandemig y coronafeirws barhau i daro’r farchnad lafur, yn ôl ffigyrau swyddogol.
Dywedodd y Swyddfa Ystadegau Gwladol (ONS) fod diswyddiadau wedi cyrraedd y lefel uchaf erioed o 370,000 yn y chwarter.
Cynyddodd diweithdra yn y Deyrnas Unedig i 4.9% ym mis Hydref, i fyny o 4.8% yn y mis blaenorol.
Fodd bynnag, roedd hyn yn is na disgwyliadau economegwyr, a ragwelodd gyfradd ddiweithdra o 5.1% ym mis Hydref.
Gostyngodd nifer y gweithwyr cyflogedig yn y Deyrnas Unedig ychydig fis diwethaf, ac mae wedi gostwng 819,000 rhwng mis Chwefror a mis Tachwedd oherwydd effaith y coronafeirws.
Dywedodd Darren Morgan, cyfarwyddwr ystadegau economaidd y Swyddfa Ystadegau Gwladol: “Yn gyffredinol rydym wedi gweld tueddiadau diweddar yn parhau, gyda gwanhau pellach yn y farchnad lafur.
“Mae’r ffigurau treth misol diweddaraf yn dangos dros 800,000 yn llai o weithwyr cyflogedig ym mis Tachwedd nag ym mis Chwefror, gyda dadansoddiad newydd yn canfod bod dros draean o’r gostyngiad hwn yn dod o’r sector lletygarwch.
“Yn y tri mis hyd at fis Hydref, roedd cyflogaeth yn dal i ostwng yn sydyn ac roedd diweithdra’n codi, ond nid oedd nifer y bobl nad oeddent yn gweithio nac yn chwilio am waith wedi newid fawr ddim.
“Roedd oriau cyfartalog fesul gweithiwr yn parhau i wella, er bod hyn cyn yr ail gyfyngiadau symud yn Lloegr.
“Er bod cynnydd arall yn nifer y diswyddiadau yn y tri mis diwethaf yn gyffredinol, dechreuon nhw leddfu yn ystod mis Hydref.”
Datgelodd y Swyddfa Ystadegau Gwladol hefyd fod 547,000 o swyddi gwag yn y Deyrnas Unedig – cynnydd o 110,000 ar y chwarter blaenorol.
Dywedodd y Gweinidog Cyflogaeth Mims Davies: “Mae wedi bod yn flwyddyn wirioneddol heriol i lawer o deuluoedd ond gyda brechlyn yn dechrau cael ei gyflwyno gyda mwy efallai i ddilyn a nifer y swyddi gwag yn cynyddu, mae gobaith ar y gorwel ar gyfer 2021.”
