Mae’r farchnad dai wedi gweld y dechrau cryfaf i’r flwyddyn ers 2005, yn ôl y data diweddaraf.
Bu cynnydd o 11.2% mewn prisiau tai rhwng Ionawr 2021 ac Ionawr 2022, o gymharu â 10.4% ym mis Rhagfyr 2021, dros y Deyrnas Unedig, meddai Cymdeithas Adeiladu Nationwide.
Er hynny, dywedodd y Nationwide ei bod hi’n debygol y bydd y farchnad yn arafu eleni.
Ni fydd tai mor fforddiadwy, ac mae hynny’n debygol o arafu’r twf yn y farchnad, wrth i gyllidebau pobol gael eu gwasgu gan gynnydd mewn costau byw, meddai.
Mae sawl arolwg wedi dangos mai Cymru welodd y twf blynyddol uchaf mewn prisiau tai yn 2021 hefyd.
“Llai fforddiadwy”
Dywedodd Robert Gardner, prif economegydd Nationwide: “Bu cynnydd blynyddol o 11.2% mewn prisiau tai ym mis Ionawr, y cynnydd cyflymaf ers mis Mehefin llynedd, a’r dechrau cryfaf i flwyddyn ers 17 mlynedd.
“Cododd prisiau 0.8% o fis i fis, ar ôl ystyried effeithiau tymhorol, gan godi am y chweched mis yn olynol.”
“Er bod y rhagolygon yn parhau’n ansicr, mae hi’n debyg y bydd y farchnad dai’n arafu eleni.
“Mae’r cynnydd mewn prisiau tai wedi mynd ymhell tu hwnt i’r cynnydd mewn cyflogau ers dechrau’r pandemig, ac o ganlyniad, mae fforddiadwyedd tai wedi dod yn llai ffafriol.
“Er enghraifft, mae blaendal o 10% ar gyfer tŷ arferol i rywun sy’n prynu am y tro cyntaf yn gyfystyr â 56% o’u henillion gros blynyddol, y ganran uchaf erioed.
“Mae cwymp mewn fforddiadwyedd yn debygol o arafu gweithgarwch y farchnad a’r cynnydd mewn prisiau tai, yn enwedig gan fod cyllidebau aelwydydd dan bwysau yn sgil cynnydd sydyn mewn costau byw.”
Chwyddiant
Dywedodd Gabriella Dickens, uwch economegydd gyda Pantheon Macroeconomics y gallai prisiau tai gynyddu eto os yw aelwydydd yn barod i wario’r arian y gwnaethon nhw ei gynilo yn ystod y pandemig.
“Ond nid yw twf prisiau tai wedi gwneud yn dda mewn cyfnodau o chwyddiant uchel, yn sgil yr ergyd i incymau gwirioneddol,” meddai Gabriella Dickens.
“Yn wir, rydyn ni’n disgwyl i incymau gwario gwirioneddol aelwydydd ostwng tua 1.5% eleni wrth i chwyddiant gynyddu a threthi godi.”
Prisiau tai sengl Cymru wedi codi 24.4% ers dechrau’r pandemig
Prisiau tai’n parhau i godi: “Mae ein cymunedau’n dioddef,” medd Mabon ap Gwynfor
