Fydd dim rhaid i dîm Cymru ynysu cyn wynebu Ffrainc

Mae Gweinidog Chwaraeon Llywodraeth Ffrainc wedi cadarnhau na fydd rhaid i dîm rygbi Cymru ynysu cyn herio Ffrainc yn Paris ar benwythnos olaf Pencampwriaeth y Chwe Gwlad.

Roedd y Llywodraeth eisoes wedi rhoi sêl bendith i dîm Ffrainc deithio, ond roedd hi’n aneglur a fyddai’n rhaid i Gymru a’r Alban ynysu am saith diwrnod cyn wynebu’r Ffrancwyr.

Bu’n rhaid i drefnwyr y Chwe Gwlad lunio cynlluniau wrth gefn a chryfhau rheolau coronafeirws i geisio argyhoeddi Llywodraeth Ffrainc fod modd cynnal y gemau yn ddiogel.

Fis Ionawr, cafodd Cwpan Pencampwyr Heineken a’r Cwpan Her eu hatal dros dro ar ôl i Lywodraeth Ffrainc ddweud na ddylai clybiau chwarae yn y cystadlaethau.

Swigen Undeb Rygbi Cymru

“Mae Rygbi Ffrainc wedi darparu protocol iechyd llym i ni, ac mae’r penderfyniad wedi’i wneud gan y Llywodraeth y bydd y twrnamaint, gan greu swigod, yn mynd yn ei flaen gan ddechrau ar Chwefror 6,” meddai Roxana Mărăcineanu, Gweinidog Chwaraeon Ffrainc.

Roedd rheolau Covid-19 ar waith yn ystod gemau’r hydref y llynedd, ac mae Wayne Pivac, prif hyfforddwr Cymru, eisoes wedi dweud y bydd rheolau hyd yn oed yn llymach yn eu lle eleni.

Daeth carfan Cymru ynghyd yr wythnos ddiwethaf gan ffurfio swigen y tîm cenedlaethol ar gyfer y bencampwriaeth.

Ond mae’n bosib y bydd rhaid i chwech o chwaraewr rygbi rhyngwladol Cymru sydd yn chwarae yn Lloegr ddychwelyd i’w clybiau yn ystod y Bencampwriaeth y Chwe Gwlad pe na baen nhw yn cael eu dewis i chwarae dros Gymru.

Gohirio gemau?

Ar ôl enwi ei garfan ar gyfer y Chwe Gwlad, rhybuddiodd Wayne Pivac fod y coronafeirws yn parhau i fod yn fygythiad i’r gystadleuaeth.

Fodd bynnag, pe bai rhaid gohirio neu ganslo gemau oherwydd achosion o’r coronafeirws ymhlith unrhyw garfan, yna mae trefnwyr y gystadleuaeth yn mynnu y byddai pob ymdrech yn cael ei wneud i gynnal y gemau ar ddyddiad arall.

Mae pythefnos o orffwys yn cynnig cyfle i wneud hyn ond yn ôl y trefnwyr, fydd gemau sy’n cael eu canslo ddim yn arwain at fuddugoliaeth o 28-0 fel digwyddodd yng Nghwpan Cenhedloedd yr Hydref y llynedd.

Bydd Cymru yn wynebu Iwerddon y tu ôl i ddrysau caëedig yng Nghaerdydd y penwythnos hwn.

Gemau Cymru yn y Bencampwriaeth eleni:

‘Digon i wella arno’, medd Prif Hyfforddwr Cymru

“Ar ôl esbonio’r hyn a wnaethom yn yr hydref – ein methodoleg – mae nawr rhaid perfformio ar y cae ac ennill gemau”