Bydd tîm pêl-droed Cymru’n gobeithio adeiladu ar eu pwynt gwerthfawr yng Nghroatia, wrth iddyn nhw groesawu Latfia i Stadiwm Dinas Caerdydd heno (nos Fawrth, Mawrth 28) ar gyfer eu gêm gartref gyntaf yn ymgyrch ragbrofol Ewro 2024.
Prin y byddai neb wedi disgwyl iddyn nhw gael gêm gyfartal oddi cartref yn erbyn y ffefrynnau i ennill y grŵp, ond mae’r canlyniad wedi gosod seiliau cadarn i dîm sy’n chwarae eu hymgyrch gyntaf heb Gareth Bale a Joe Allen, gyda Chris Gunter a Jonny Williams bellach wedi ymddeol hefyd.
Ond ym munudau ola’r ornest yn Split, ychwanegodd Nathan Broadhead ei enw i restr sgorwyr rhyngwladol Cymru, wrth i’r ymosodwr ifanc daro’r bêl i’r rhwyd gyda’i gyffyrddiad cyntaf ar y llwyfan rhyngwladol.
Bydd yr ornest hon yn dra gwahanol, gyda Chymru’n ffefrynnau i gipio’r triphwynt yn erbyn wythfed tîm gwanna’r cyfandir a thîm gollodd eu gêm ddiwethaf o 3-2 yn erbyn Gweriniaeth Iwerddon yn Nulyn.
Yn ôl Rob Page cyn y gemau, byddai cipio chwe phwynt yn eu dwy gêm gyntaf fel “ennill y loteri”.
“Rhaid i ni fod yn synhwyrol,” meddai am ei benderfyniad i dynnu rhai o’r chwaraewyr amlycaf oddi ar y cae yng Nghroatia.
“Pedwar pwynt roedden ni wedi’u targedu.
“Dydy’r pedwar blaen ddim yn chwarae ar lefel clybiau, pe baen nhw wedi chwarae 95 munud, a fydden ni’n cael y gorau allan ohonyn nhw nos Fawrth?
“Rydyn ni’n edrych ar y gêm yn erbyn Latfia fel un i’w hennill, felly dyna’r cynllun erioed.
“Roedd yn bwynt bonws i ni y noson o’r blaen; y cynllun yn mynd i mewn i [y gemau hyn] oedd: ‘Pe baen ni’n cael pedwar pwynt, gwych; chwe phwynt ac rydyn ni wedi ennill y loteri, gwych.”
- Mae disgwyl i Gymru anrhydeddu Gareth Bale, yn ogystal â Joe Allen, Chris Gunter a Jonny Williams cyn dechrau’r gêm heno.
Tom Bradshaw yn gobeithio manteisio ar ail gyfle gyda Chymru
Ollie Cooper yn gobeithio dilyn yn ôl troed Joe Allen
Cyfnod newydd ar ddechrau yn hanes pêl-droed Cymru, medd Chris Mepham
