Mae Rabbi Matondo, chwaraewr rhyngwladol Cymru, wedi datgelu mai ef yw’r pêl-droediwr diweddaraf i gael ei gam-drin yn hiliol ar-lein.
Daeth hyn oriau’n unig ar ôl codi’r boicot cyfryngau cymdeithasol oedd mewn grym dros y penwythnos.
Datgelodd y llanc 20 oed o Gaerdydd, sydd ar fenthyg yn Stoke o Schalke, ei fod wedi derbyn negeseuon hiliol ar Instagram.
Ysgrifennodd Matondo ar Twitter: “Da gweld y boicot wedi newid dim byd @instagram”.
Good to see the boycott changed nothing @instagram… ? pic.twitter.com/7dBRAPFTFq
— Rabbi Matondo (@rabbi_matondo) May 4, 2021
Derbyniodd Morgan Whittaker, ymosodwr Abertawe, negeseuon hiliol yn ystod boicot y byd pêl-droed o’r cyfryngau cymdeithasol.
Dros y misoedd diwethaf, mae Ben Cabango, Jamal Lowe a Yan Dhanda wedi derbyn negeseuon tebyg.
Cynhaliodd Abertawe eu boicot cyfryngau cymdeithasol wythnos o hyd eu hunain ar ddechrau mis Ebrill.
“Hollol ffiaidd”
“Mae’r clwb yn ymwybodol o’r cam-drin hiliol ffiaidd a dderbyniodd Rabbi Matondo ar y cyfryngau cymdeithasol dros nos a byddwn yn gwneud popeth o fewn ein gallu i helpu’r awdurdodau i ddod a’r bobol sydd o dan sylw i gyfiawnder,” meddai llefarydd ar ran Stoke.
Dywedodd llefarydd ar ran Facebook, sy’n berchen ar Instagram: “Mae’r gamdriniaeth a anfonwyd at Rabbi Matondo yn annerbyniol.
“Nid ydym am ganiatáu i hyn ddigwydd ar Instagram a gwnaethom ddileu’r cyfrifon a’i hanfonodd.
“Fe wnaethom gyhoeddi’n ddiweddar y byddwn yn cymryd camau llymach yn erbyn pobl sy’n torri ein rheolau mewn negeseuon ac yn ddiweddarach yr wythnos hon, rydym yn cyflwyno offer newydd i helpu i atal pobol rhag gweld negeseuon difrïol gan ddieithriaid.
“Nid oes modd datrys yr her hon dros nos ond rydym wedi ymrwymo i wneud yr hyn a allwn i gadw ein cymuned yn ddiogel rhag camdriniaeth.”
Pedwerydd chwaraewr tîm pêl-droed Abertawe wedi’i sarhau’n hiliol
Sefydliadau pêl-droed yn dilyn esiampl Abertawe wrth gynnal boicot o’r cyfryngau cymdeithasol
