Symbolau hiliol i’w gweld mewn protest y tu allan i’r Senedd

Protestwyr sydd yn erbyn cyflwyno pasys mewn theatrau a sinemau wedi ymgynnull y tu allan i’r Senedd

Cafodd symbolau Natsïaidd eu gweld ar risiau’r Senedd ddoe (Tachwedd 9) mewn protest yn erbyn ymestyn pasys Covid-19.

Sail y brotest oedd bod y pasys yn cyfyngu ar ryddid personol wrth i’r llywodraeth ddweud y bydd angen pás Covid i fynd i sinemâu a theatrau.

Ond gwelwyd bolltau ‘SS’ ar ymbarél un protestiwr sy’n symbol o oruchafiaeth wyn a neo-Natsïaidd.

Mewn lluniau dros wefannau cymdeithasol mae un o’r protestwyr yn arddangos y symbolau’r ‘SS’ sy’n dweud: “Dywedwch na wrth basbort brechu”.

Cafodd y newyddiadurwr Peter Gillibrand, newyddiadurwr gyda gwasanaeth newyddion LBC, ei syfrdanu gan yr hyn a welodd a rhannodd y llun ar ei gyfrif Twitter:

“Mae gan yr ymbarél hwnnw symbol “SS” Nazi arno mewn rali Pasbort gwrth-Vax yn #Cardiff.

“Mae hyn yn hollol ffiaidd i’w weld. Teimlwch yn rhydd i brotestio ond rhowch y gorau i gymharu’r sefyllfa bresennol i’r Natsïaid.”

Roedd yr SS, dan arweiniad Heinrich Himmler, yn gyfrifol dros heddlu’r Natsïaid yn yr Almaen dan unbennaeth Hitler.

Yn dilyn yr Ail Ryfel Byd, fe fabwysiadwyd y symbol gan grwpiau hiliol sy’n credu mewn goruchafiaeth wyn ynghyd â neo-Natsïaid ledled y byd.

Seren

Gwelwyd rhai protestwyr hefyd yn gwisgo bathodynnau yn dweud “Seren Covid”.

Gorfodwyd Iddewon ledled Ewrop i wisgo bathodyn ar ffurf seren felyn.

Fe ddywedodd The Cardiffian ar ei gyfrif Twitter: “Mae bathodynnau gyda ‘Seren COVID’ yn cael eu trosglwyddo gan brotestiwr yn y rali’r prynhawn yma yn erbyn ymestyn pasys COVID i lawr yn y Senedd.”

Roedd arwyddion eraill yn cynnwys “apartheid meddygol” yn ogystal â phosteri oedd yn dweud mai’r “Cyfryngau oedd y feirws”.

Cau’r Senedd

Gyda disgwyl i brotestwyr ymgynnull fe benderfynodd y Llywydd, Elin Jones, gau adeilad Senedd Cymru ar brynhawn dydd Mawrth (Tachwedd 9), er lles diogelwch aelodau a staff.

Dywedodd mai cadw “aelodau, aelodau o’r cyhoedd a staff yn ddiogel” oedd pwrpas hyn, yn seiliedig ar gyngor diogelwch proffesiynol.

Fis diwethaf gwelwyd cyfarwyddyd gan staff diogelwch i beidio â chaniatáu i bobl adael Tŷ Hywel a’r Senedd er lles eu diogelwch ar noson y bleidlais wreiddiol i gyflwyno Pasys Covid yng Nghymru.

Protestiadau

Mae’r protestiadau hyn yn un o nifer ledled Cymru sy’n gwrthwynebu cyfyngiadau Covid-19 sy’n cael eu gweithredu gan Lywodraeth Cymru.

Fis Gorffennaf bu yna dorf y tu allan i dŷ’r Prif Weinidog, Mark Drakeford gan godi cwestiynau am ddiogelwch gwleidyddion yng Nghymru.

Bu hefyd protestio y tu allan i swyddfa’r Aelod Seneddol Llafur dros y Rhondda, Chris Bryant yn erbyn cyfyngiadau Covid.

Bydd y rheolau newydd yn dod i rym ddydd Llun (15 Tachwedd).

Fe ofynnodd Golwg360 wrth Lywodraeth Cymru am ymateb.

Senedd

Protestiadau pasys Covid cyn pleidlais ar ymestyn y cynllun i theatrau a sinemâu

Jacob Morris

Mae Plaid Cymru wedi dweud y byddan nhw’n cefnogi’r cynlluniau

Poblogaidd

Swyddi

YTC 4 Llan CLT

Asesydd Allanol – Iechyd a Gofal Cymdeithasol CC (Cymraeg yn Ddymunol)

Asiantaeth y Swyddfa Brisio

Arolygydd Eiddo – Siaradwr Cymraeg

Prifysgol Bangor

Swyddog Ardal Wledig (Dyffryn Conwy)

← Stori flaenorol

Cymru

Adam Price eisiau i Gymru arwain y frwydr yn erbyn newid hinsawdd

‘Ni ddylai maint ein cenedl gyfyngu ar yr hyn allwn ni ei gyflawni wrth fynd i’r afael â newid hinsawdd,’ meddai arweinydd Plaid Cymru

Stori nesaf →

Gwasanaethau Brys

Sir Benfro: Dyn 41 oed wedi marw fis ar ôl ymosodiad

Cafodd dyn 32 oed ei arestio yn y fan a’r lle fis diwethaf, ac mae’r heddlu’n parhau â’u hymchwiliad i’r digwyddiad

Hefyd →

Cymru

Cefnu ar gynlluniau i orfodi pleidiau i sicrhau bod hanner eu hymgeiswyr yn fenywod

Roedd Plaid Cymru’n cefnogi’r syniad, tra bo’r Ceidwadwyr Cymreig yn falch o weld y Senedd yn pleidleisio o blaid cefnu arno

1 sylw

Aled Gwyn Job 13 Tachwedd 2021, 12:16

YN ol Llywydd y Senedd, Elin Jones, haid o anwariaid(rabble) oedd y rhai a ddaeth ynghyd y tu allan i’r Senedd y noson o’r blaen.

Sylw gyda’r mwya nawddoglyd a gwrth-ddemocrataidd a gafwyd erioed gan y dosbarth gwleidyddol Cymreig presennol o bosib.

Ond ymddengys bod Golwg 360 hefyd yn cytuno gyda hyn o ystyried swm a sylwedd yr erthygl a gyhoeddwyd ganddynt am y digwyddiad ar eu gwefan.

Gyda honno yn hoelio’i sylw’n llwyr ar y ffaith bod ambell i symbol natsiaidd wedi ei harddangos ymhlith y dorf o 600 ddaeth yno o flaen y bleidlais yn y Senedd.

A hynny’n awgrymu yn ei hanfod mai rhai’n cydymdeimlo gyda natsiaeth oedd y gynulleidfa a phobol felly yn llawn haeddu cael eu pardduo a’u difrio.

Peth od iawn oedd canolbwyntio cymaint ar sticer ar ymbarel un protestiwr,heb son am wyrdroi holl ergyd y sticer honno.

Nid ymhyfrydu mewn natsiaeth oedd y sticer, ond cyfleu pryder bod Y Senedd yn ymddwyn mewn modd sydd yn dechrau ymdebygu i bolisi pasport gwahaniaethu enwog a basiwyd gan y Natsiaid yn y 1930au.

Ac yn sicr ddigon, nid haid o natsiaid gorffwyll oedd ar risiau’r Senedd nos Fawrth, ond yn hytrach ystod o bobol gyffredin ymwybodol a chydwybodol o bob oed.

Ond gwendid mwyaf yr erthygl heb os oedd iddi anwybyddu’r holl ddadleuon grymus a gyflwynwyd yn ystod y rali ei hun.

Dim ond dadl gwta o ryw 20 munud a gafwyd yn y Senedd ei hun, ond y tu allan cafwyd fforwm agored fyrlymus o ddwy awr a hanner, gyda 15 o siaradwyr yn cyfleu cyfres o bryderon gwahanol am y polisi gerbron.

A rheiny’n amrywio o bryderon gwyddonol, gwleidyddol, cymdeithasol, economaidd, meddyliol a chorfforol.

Ar ran Gwlad, dadleuais bod parchu’r gydwybod unigol yn rhan hanfodol o’r traddodiad Anghydffurfiol Cymreig sydd wedi siapio cymaint arnom fel cenedl.

Ac mai sarnu’r traddodiad hwnnw yw dweud wrth hyd at 25% o’r boblogaeth sydd wedi dewis ymatal rhag triniaeth feddygol arbrofol eu bod bellach i’w gwahardd yn llwyr o’n bywyd cymdeithasol arferol.

Soniais hefyd bod rhannu pobol fel hyn yn peryglu’r cyfalaf cymdeithasol (social capital) gwerthfawr sydd ganddon yma yng Nghymru-sef y cysylltiadau agos sydd ganddon gyda’n gilydd fel unigolion a chymunedau yma a’r ymddiriedaeth y mae hwnnw yn eu greu rhyngom fel pobol.

Gellid dadlau hefyd bod erthygl Golwg 360 yn nodweddu’r modd y mae’n cyfryngau Cymraeg wedi ymdrin gyda’r saga sydd wedi domiwnyddu ein bywydau dros yr 20 mis diwethaf.

Mae potensial gan iaith leiafrifol fel Cymraeg i weithredu fel gwrthglawdd yn erbyn propoganda sy’n digwydd trwy’r Saesneg.

Ond yn yr achos hwn, mae’r iaith ei hun fel petai wedi ei herwgipio gan y grymoedd yn hyrwyddo’r holl propoganda trwm ynghylch covid.

Gan mai darlun hollol unochrog a rhannol y mae’r cyfryngau Cymraeg wedi ei gyflwyno i’n sylw fel cenedll-heb roi unrhyw ofod i farnau gwahanol am y sefyllfa.

Gan amddifadu pobol o wybodaeth bwysig ac allweddol allai eu helpu i gyrraedd mwy o ddealltwriaeth ynghylch yr holl sefyllfa gymhleth yr ydym ynddi ar hyn o bryd.

Mae’r diffyg democrataidd yn y gofod cyhoeddus Cymraeg yn ymestyn y tu hwnt i sylwadau dilornus Elin Jones felly.

Rhywbeth a ddylai beri pryder gwirioneddol i bawb ohonom, beth bynnag ein barn am y sefyllfa bresennol.

Does ond gobeithio y gall yr egin democrataidd newydd a welwyd ymhlith ‘Senedd y Bobol’ nos Fawrth ddylanwadu rywfodd ar ein gofod cyhoeddus Cymraeg yn ei dro hefyd.

Mae’r sylwadau wedi cau.