Mae’r Ceidwadwyr Cymreig yn ofni y bydd hwb ariannol o £500,000 i wella mynediad at ddiffiblwyr yng Nghymru yn annigonol.
Ddoe (Medi 15) fe gyhoeddodd Llywodraeth Cymru buddsoddiad o hanner miliwn o bunnoedd ychwanegol i wella mynediad cymunedol at ddiffiblwyr er mwyn rhoi hwb i gyfraddau goroesi ataliad ar y galon oedd yn digwydd y tu allan i’r ysbyty.
Er bod y Ceidwadwyr yn croesawu y buddsoddiad ychwanegol maen nhw’n ofni nad yw’n ddigon i fynd i’r afael â’r cyfraddau ataliad ar y galon ar hyn o bryd.
“Rwy’n ofni bod £500,000 yn swm pitw ac nid yw’n ddigon i sicrhau newid ystyrlon,” meddai Tom Giffard, Gweinidog Cysgodol y Ceidwadwyr dros Chwaraeon.
“Dylai achub bywydau fod yn brif flaenoriaeth i wleidyddion o bob lliw, ac mae gwella mynediad i ddiffiblwyr, a gosod mwy ohonynt, yn allweddol i hynny oherwydd po fwyaf o ddiffiblwyr sydd gennym, y mwyaf o fywydau y gallwn eu hachub.”
Ar hyn o bryd mae 5,423 o ddiffiblwyr cyhoeddus wedi’u cofrestru gydag Ymddiriedolaeth Gwasanaeth Ambiwlans Cymru a’r rhwydwaith diffibriliwr cenedlaethol.
Ond mae tua 6,000 o bobl bob blwyddyn yng Nghymru yn dioddef ataliad sydyn ar y galon.
Sgiliau CPR ar y cwricwlwm
Mae’r Ceidwadwyr Cymreig hefyd wedi bod yn galw ar y llywodraeth i gyflwyno sgiliau achub bywyd i gwricwlwm newydd Cymru i ddysgu pobl ifanc am sgiliau CPR a difiblwyr.
“Mae’n drueni na adawodd aelodau Llafur wleidyddiaeth y pleidiau wrth y drws a chefnogi ein cynnig a fyddai wedi rhoi gwell cyfle i sefydliadau a chlybiau chwaraeon brynu a gosod ddifiblwr.”
Cyhoeddodd gweinidogion Llafur yr arian ychwanegol ar yr un diwrnod oedd Ceidwadwyr Cymreig yn cynnal dadl am y pwnc ar lawr y siambr.
Daw hyn ar ôl i sylw yn y wasg am ataliadau ar y galon yr haf hwn gyda nifer o farwolaethau proffil uchel fel y pêl-droediwr Christian Eriksen, yn ogsytal â rhai yng Nghymru.
Fis diwethaf bu farw Alex Evans, 31 ar y cae chwarae yng Nghlwb Rygbi Cwmllynfell.
Fis Gorffennaf fe gyhoeddodd y llywodraeth gyllid pellach o £2.5m dros y tair blynedd nesaf ar gyfer Achub Bywyd Cymru.
Canolfannau Chwaraeon
Bydd yr arian ychwanegol yn mynd tuag at alluogi adeiladau cymunedol a meysydd chwaraeon i gael mynediad at ddiffiblwr.
Amcangyfrifir bod siawns claf o oroesi ataliad ar y galon y tu allan i’r ysbyty yn gostwng 10 y cant gyda phob munud sy’n pasio.
Drwy osod peirannau hyn mewn lleoliadau cymunedol, y gobaith yw gwella cyfraddau goroesi’r rhai sy’n dioddef ataliad ar y galon y tu allan i ysbyty.
Teyrngedau i chwaraewr rygbi fu farw ar y cae
