Mae Nick Thomas-Symonds, aelod seneddol Torfaen a llefarydd materion cartref Llafur yn San Steffan, wedi datgelu iddo dderbyn bygythiadau i’w fywyd yn y gorffennol.
Daw ei sylwadau ar raglen BBC Breakfast wrth i ddyn 76 oed o Bontycymer ger Pen-y-bont ar Ogwr gael ei arestio ar amheuaeth o gyfathrebu’n faleisus â Chris Bryant, aelod seneddol Llafur y Rhondda.
“Dw i wedi cael digwyddiadau ers i fi ddod yn aelod seneddol, boed yn ymddygiad bygythiol tra dw i allan ar y strydoedd, bygythiadau i’m bywyd, llythyrau ofnadwy, e-byst ofnadwy,” meddai.
“Dw i ddim ar fy mhen fy hun yn hynny o beth mewn unrhyw ffordd.
“Dw i ddim yn nabod aelod seneddol sydd heb ddioddef yn y fath fodd.
“Mae’n amlwg fod rhaid i rywbeth newid nawr.”
Mae’n dweud ei fod e wedi gwneud newidiadau i’w ffordd o weithredu fel aelod seneddol ers i Jo Cox, aelod seneddol Batley & Spen, gael ei llofruddio y tu allan i gymhorthfa.
“Pethau fel apwyntiadau ar gyfer cymorthfeydd, pethau fel bod yn ofalus iawn rhag hysbysebu ymlaen llaw lle dw i’n mynd, a dw i’n gwybod fod aelodau seneddol eraill yn gwneud hynny nawr,” meddai.
Ychwanega ei fod yn gobeithio y bydd adolygiad diogelwch yn cael ei gynnal “yn gyflym”.
Cofio Syr David Amess
Yn y cyfamser, mae Nick Thomas-Symonds yn dweud nad yw e wedi amgyffred â marwolaeth Syr David Amess.
“Mae gen i synnwyr o anghrediniaeth o hyd, mewn gwirionedd, ynghylch yr hyn sydd wedi digwydd,” meddai.
Mae’n dweud bod Syr David Amess yn “ddyn caredig a hael iawn”.
“Fe wnes i gyfarfod â David gyntaf pan ddaeth e i mewn i’r Senedd yn 2015,” meddai.
“Do’n i ddim wedi gweithio yn y Senedd o’r blaen ac ro’n i’n dal i geisio ffeindio fy ffordd yn y lle.
“Daeth David ata’ i a gofyn sut oeddwn i a sut ro’n i’n ymgartrefu.
“Fe wnaeth y sgwrs honno grisialu David yn ei hanfod.
“Roedd e’n ddyn caredig a hael iawn.”
Teyrngedau
Fe fydd aelodau seneddol yn ymgynnull heddiw (dydd Llun, Hydref 18) i dalu teyrnged i Syr David Amess.
Mae Boris Johnson, prif weinidog Prydain, yn annog pobol i fod yn oddefgar ac i “roi casineb o’r neilltu” er cof amdano.
Bydd aelodau seneddol yn treulio ychydig oriau yn San Steffan yn hel atgofion amdano, a hynny ar ôl bore o weddïau a munud o dawelwch am 2.30yp.
Bydd Syr Lindsay Hoyle, Llefarydd Tŷ’r Cyffredin, yn gwneud datganiad cyn i Boris Johnson alw am ohirio busnes y Tŷ ar gyfer sesiwn o deyrngedau tan 5.30yh.
Arestio dyn 76 oed ar amheuaeth o gyfathrebu’n faleisus â Chris Bryant
