Pensiynwr wedi’i garcharu am ladd ei wraig yn ystod y cyfyngiadau clo cyntaf

Mae pensiynwr a dagodd ei wraig bum niwrnod i mewn i’r cyfyngiadau clo cyntaf wedi cael ei ddedfrydu i bum mlynedd yn y carchar.

Dywedodd Anthony Williams, 70, wrth yr heddlu ei fod “wedi tagu” ei wraig Ruth, 67, yn eu cartref yng Nghwmbrân fore Mawrth 28 y llynedd, wedi iddo “snapio” yn dilyn cyfnod o deimlo’n ddigalon ac yn bryderus.

Cafwyd Williams yn ddieuog o lofruddiaeth ddydd Llun yn dilyn achos lle dadleuodd seicolegydd fod ei bryder “wedi dwysáu” oherwydd y cyfyngiadau, a oedd yn amharu ar ei allu i arfer hunanreolaeth.

Ddydd Iau fe ymddangosodd i gael ei ddedfrydu yn Llys y Goron Abertawe ar ôl cyfaddef dynladdiad oherwydd cyfrifoldeb lleiedig.

“Achos trasig ar sawl lefel”

Dywedodd y Barnwr Paul Thomas ei fod yn “achos trasig ar sawl lefel”, ond yn ei farn ef cafodd cyflwr meddyliol Williams ei “effeithio’n ddifrifol ar y pryd”.

Dywedodd y Barnwr Thomas: “Y drasiedi fwyaf ysgubol yma yw dynes 67 oed oedd â chymaint o fywyd i fyw, yn colli ei bywyd oherwydd gweithred o drais mawr yn nwylo, yn llythrennol, dyn roedd hi’n ei garu am bron i 50 mlynedd.”

Dywedodd Williams wrth yr heddlu ei fod wedi dioddef nosweithiau di-gwsg yn y cyfnod cyn yr ymosodiad oherwydd ofnau “dibwys”, gan gynnwys pryder y byddai’n rhedeg allan o arian.

Mewn cyfweliadau a ddarllenwyd i’r rheithgor, cytunodd Williams â ditectifs mai ef oedd yn gyfrifol am ladd ei wraig o 46 mlynedd, gan ddweud wrthynt ei fod wedi “snapio” tra yn y gwely.

Dywedodd ei fod wedi dechrau ei thagu ar ôl iddi ddweud wrtho am “ddod dros” ei bryderon.

Dywedodd ei fod wedi mynd ar ôl ei wraig i lawr y grisiau a’i chipio gerfydd ei gwddf wrth iddi geisio datgloi’r drws ffrynt i ddianc, gan ddweud ei fod wedi “ei thagu i farwolaeth”.

Cafodd Mrs Williams ei chanfod ym mhortsh cartref y cwpl gyda phâr o allweddi yn ei llaw.

Aethpwyd a hi i’r ysbyty lle dywedwyd ei bod wedi marw ar ôl dioddef gwaedlif yn ei llygaid, ei hwyneb a’i cheg yn ogystal â phum asgwrn wedi torri yn ei gwddf – sy’n yn gyson â thagu.

Rhoddwyd ei hachos marwolaeth fel pwysau i’r gwddf, gyda patholegydd yn dweud nad oedd diffyg marc o reidrwydd yn golygu na ddefnyddiwyd cord gŵn gwisgo “meddal” a ganfuwyd yn eu cartref.

Arestiwyd Williams ar amheuaeth o lofruddiaeth yn y fan a’r lle a dywedodd wrth swyddogion: “Mae’n ddrwg gennyf, fe wnes i snapio, mae’n ddrwg gennyf.”

Dywedodd merch y cwpl, Emma Williams, 40, wrth y llys bod ei rhieni wedi treulio “90% o’u hamser gyda’i gilydd”, eu bod “ddim yn bobl am ddadlau”, ac nad oedd hi erioed wedi clywed y naill na’r llall hyd yn oed yn “codi eu llais” ar ei gilydd.

Dywedodd Ms Williams: “Mae fy nhad yn gawr tyner.”

“Obsesiwn”

Ond dywedodd fod Williams wedi dangos arwyddion o ymddygiad rhyfedd o fis Ionawr 2020 ymlaen, gan gynnwys honni ei fod yn mynd i golli’r cartref a datblygu “obsesiwn” gyda diffodd goleuadau a gwres i arbed arian.

Ond dywedodd fod gan y cwpl gynilion o tua £148,000, yn ogystal â £18,000 yn eu cyfrif cyfredol yn y dyddiau cyn cyhoeddi’r cyfyngiadau clo.

Dywedodd Ms Williams bod ei thad yn gwylio adroddiadau newyddion ar y pandemig byd-eang “drwy’r amser” ac yn credu “nad oes neb byth yn gadael y tŷ eto”.

Ni roddodd Williams dystiolaeth yn ei achos, ond dywedodd wrth gyfwelwyr yr heddlu ei fod wedi poeni am fethu â phrynu esgidiau newydd a’r anallu i gael rhywun i drwsio teils ar y to pe baent yn dod yn rhydd.

Dywedodd hefyd ei fod wedi cael y cyfyngiadau clo “mewn gwirionedd, yn anodd iawn” a dim ond pum niwrnod i mewn i’r cyfyngiadau roedd yn teimlo’n “isel” a’i fod yn poeni y byddai’r cwpl yn rhedeg allan o arian parod oherwydd bod banciau ar gau.

Dywedodd ei fod wedi ymdopi “ddim yn dda iawn” yn y 18 mis ers iddo ymddeol o ffatri Just Rollers Cwmbrân, gan ddweud nad oedd gan y cwpl “lawer o fywyd cymdeithasol”.

Ond disgrifiodd ei wraig fel person “hapus” ers iddi ymddeol o siop Asda bedair blynedd yn gynharach, er iddi gael diagnosis o iselder.

Dywedodd y seicolegydd Dr Alison Witts wrth yr achos bod pryder ac iselder Williams wedi’u “dwysáu” gan y mesurau coronafeirws anodd a osodwyd ddyddiau ynghynt gan amharu ar ei allu i arfer hunanreolaeth.

Dywedodd Dr Witts fod swydd Williams yn y ffatri wedi bod yn “un o’i brif fecanweithiau ymdopi” o ran ei “agwedd niwrotig”, ond pan ymddeolodd fe “gollodd yr holl strwythur ac ymdeimlad o bwrpas”.

Ond dywedodd seicolegydd arall, Dr Damian Gamble, nad oedd gan Williams hanes dogfennol o ddioddef iselder a bod “dim amddiffynfeydd seiciatrig” ar gael iddo, gan ddweud ei fod yn credu bod Williams yn “gwybod beth roedd yn ei wneud ar y pryd”.

Hefyd heddiw, cafodd Helen Mary Jones AoS ei cheryddu gan Farnwr yr achos am rannu trydariad ‘amhriodol’ am yr achos.

Gallwch ddarllen mwy am hynny isod.