Mae busnesau yng Ngheredigion wedi croesawu penderfyniad y Cyngor Sir i gadw newidiadau traffig gafodd eu cyflwyno yn ystod y pandemig.
Fe wnaeth Cyngor Sir Ceredigion gyflwyno systemau unffordd a newidiadau i ffyrdd yng nghanol pedair o drefi’r sir yn 2020, ac maen nhw wedi penderfynu y bydd y newidiadau’n rhai parhaol.
Cafodd parthau diogel eu cyflwyno am y tro cyntaf yn Aberystwyth, Aberaeron, Ceinewydd ac Aberteifi fis Gorffennaf 2020, oedd yn golygu parcio cyfyngedig, systemau unffordd, a lledu’r palmant mewn rhai llefydd.
Bu strydoedd ar gau i geir yn ystod y dydd yng Ngheredigion yn ystod y cyfnodau clo hefyd, ac roedd y cam yn un dadleuol ar y pryd.
Y llynedd, ailgyflwynodd Cyngor Sir Ceredigion rai o elfennau’r parthau diogel dros dro, cyn cynnal ymgynghoriad ar wneud y newidiadau’n rhai parhaol.
‘Llwyddiant”
Yn Aberystwyth, bydd palmentydd lletach yn cael eu cadw yn Heol y Wig, Ffordd y Môr a’r Ffynnon Haearn.
Bydd Heol y Wig, Stryd y Baddon a Ffordd y Môr yn parhau fel strydoedd unffordd hefyd, a bydd rhywfaint o newidiadau i fannau parcio anabl ar rai o’r strydoedd.
Yn ôl perchennog caffi’r Caban, maen nhw’n hapus efo’r newidiadau parhaol yn Heol y Wig.
“Mae’r system un ffordd wedi bod yn llwyddiant,” meddai Nathan Evans wrth golwg360.
“Mae lledu’r palmant wedi bod yn hollbwysig o ran darparu lle i fwy o bobol ar Heol y Wig.
“Rydym yn hapus iawn gyda’r ffordd y bu i’r Cyngor ymateb yn ystod Covid.
“Dydyn ni ddim am weld unrhyw newidiadau o gwbl.
“Rydyn ni’n gwybod fod pobol mo’yn i bethau ddychwelyd i sut oedden nhw cynt, ond dydyn nhw [y Cyngor Sir] ddim mo’yn hynny.
“Rydyn ni’n ei weld fel cam cadarnhaol iawn.”
‘Angen ystyried parcio’
Ychwanega Rebecca Barratt, perchennog Driftwood Designs ar Heol Wig, eu bod nhw’n hapus efo’r newidiadau hefyd, a bod gan y cam y potensial i fod yn dda i fusnes.
“Roedden ni’n gweld fod y parth diogel yn gadarnhaol ac roedden ni’n mwynhau’r teimlad oedd yn ei roi i’r dref a siopwyr, yn enwedig ar Heol y Wig,” meddai cadeirydd Clwb Busnes Aberystwyth, wrth golwg360.
“Bydd yn dda i fusnes cyn belled â’u bod nhw’n ystyried materion eraill fel parcio. Mae parcio yn broblem fawr yn y dref.
“Pe bai hynny’n cael ei ystyried, yna gallai fod yn newid cadarnhaol.”
Cafodd y newidiadau i barcio ar strydoedd yn Aberystwyth, Aberteifi, Aberaeron a Cheinewydd eu gwneud yn barhaol ar Dachwedd 20, a bydd y systemau unffordd yn y pedair tref yn dod yn barhaol ar Ragfyr 20 wedi i’r Cyngor roi’r cyfarwyddyd heddiw (dydd Llun, Tachwedd 27).
Cynghorydd yn beirniadu’r syniad o gadw ardaloedd diogel Ceredigion yn barhaol
Treialu mesurau traffig a pharcio yn nhrefi arfordirol Ceredigion
