Cymuned Llanuwchllyn yn barod i brynu’r Eagles

Mae cymuned Llanuwchllyn yn barod i brynu tafarn gymunedol yr Eagles, ar ôl iddyn nhw fwrw eu targed ariannol o godi £300,000.

Er mwyn bwrw’r targed, cafodd cyfrannau eu gwerthu ac fe wnaethon nhw dderbyn £128,000 gan Lywodraeth y Deyrnas Unedig drwy’r Gronfa Ffyniant Gyffredin.

Gyda chefnogaeth Cyngor Gwynedd, bydd Menter yr Eagles yn prynu’r dafarn gan Eleri a Meirion Pugh, sy’n ymddeol ar ôl rhedeg y dafarn ers ugain mlynedd.

Mae’r fenter hefyd wedi dod o hyd i denant i redeg y dafarn, y siop a’r bwyty ar ran y gymuned, a’u gobaith yw y bydd y tenant hwnnw’n barod i ddechrau ar y gwaith cyn y Nadolig.

‘Ymdrech lew ar y cyd’

Yn ôl Grisial Llewelyn, mae’r fenter yn “hynod falch” eu bod nhw wedi llwyddo i sicrhau’r arian er mwyn prynu’r Eagles.

“Rydyn ni wedi cael ein llorio gan y gefnogaeth rydym wedi’i derbyn gan y gymuned yma yn Llanuwchllyn, a chan ffrindiau a sefydliadau dros Gymru, y Deyrnas Unedig ac, yn wir, y byd,” meddai.

“Bu hyn yn ymdrech lew ar y cyd, sydd wedi taflu goleuni ar rym y gymuned.

“Llongyfarchiadau enfawr a diolch i bawb sydd wedi bod ynghlwm ac sydd wedi buddsoddi.

“Mae ein ffocws ni bellach ar gwblhau’r pryniant cyn gynted â phosib, a chael y tenant newydd yn ei le cyn y Nadolig.

“Tra ein bod ni wedi sicrhau digon o arian i brynu’r Eagles, mae peth gwaith datblygu i’w wneud ar yr adeilad, felly rydyn ni’n gadael ein cronfa ar agor i’r rheiny nad oedden nhw eisiau prynu cyfran ond sydd efallai’n dymuno cefnogi ein menter.

“Mae modd cyfrannu drwy ddilyn y ddolen hon: https://square.link/u/pdiwog66.

“Rydyn ni hefyd yn awyddus iawn i bwysleisio pa mor uchelgeisiol ydyn ni ar ran y gymuned hon – rydyn ni’n sicr yn gweld prynu’r Eagles fel cam cyntaf tuag at gyflwyno rhagor o brosiectau a gweithgareddau sydd o fudd i’r gymuned gyfan, heddiw ac ar gyfer y dyfodol.”