Rhun ap Iorwerth am gyflwyno’i enw i arwain Plaid Cymru

Mae Rhun ap Iorwerth wedi cyhoeddi ei fwriad i gyflwyno’i enw i arwain Plaid Cymru.

Yr Aelod o’r Senedd dros Ynys Môn yw’r ymgeisydd cyntaf yn y ras i olynu Adam Price, oedd wedi ymddiswyddo’n ddiweddar.

Mewn fideo ar y cyfryngau cymdeithasol, dywed fod y blaid “ar groesffordd” a bod ganddyn nhw “heriau difrifol” yn sgil adroddiad damniol ynghylch diwylliant o ofn o fewn y blaid yn dilyn honiadau o fwlio ac agweddau rhywiaethol a gwreig-gasineb (misogyny).

Tra ei fod yn dweud nad yw’n “unigryw” i Blaid Cymru, dywed fod y blaid “o ddifri am y dasg” o’u blaenau wrth fynd i’r afael â’r sefyllfa.

Wrth drafod y darlun gwleidyddol yng Nghymru, dywed fod arni angen “Plaid Cymru sy’n ffit, ac yn barod i gynnig gweledigaeth o beth all Cymru fod”.

Neges wrth gyhoeddi fy mwriad i sefyll am arweinyddiaeth @Plaid_Cymru gyda diolch am y gefnogaeth a’r annogaeth.

🏴󠁧󠁢󠁷󠁬󠁳󠁿 pic.twitter.com/vKftfCh7fb

— Rhun ap Iorwerth (@RhunapIorwerth) May 30, 2023

Adroddiad

Fe wnaeth yr adroddiad Prosiect Pawb gan Nerys Evans ganfod methiannau yn arweinyddiaeth Adam Price wrth fynd i’r afael â honiadau o aflonyddu rhywiol a bwlio.

Ymhlith casgliadau’r adroddiad roedd y ffaith nad oes camau yn eu lle i sicrhau dull dim goddefgarwch tuag at aflonyddu rhywiol, a bod menywod wedi cael eu “gadael lawr” gan y blaid.

Roedd hefyd yn cyfeirio at achosion nad oedden nhw’n achosion unigol, a diwylliant o ofn wrth sôn am yr achosion hyn.

Fe wnaeth Adam Price ymddiheuro ar ôl i’r adroddiad gael ei gyhoeddi.