Mae Llywodraeth Cymru wedi cael eu hannog gan un o’u haelodau eu hunain i werthu’r fferm gafodd ei phrynu ar gyfer Gŵyl y Dyn Gwyrdd.

Dywed Mike Hedges, Aelod o’r Senedd dros Ddwyrain Abertawe, na ddylai gweinidogion erioed fod wedi prynu Fferm Gilestone ger tref Crughywel ym Mhowys.

Gwariodd Llywodraeth Cymru £4.25m ar fferm Gilestone, ond maen nhw’n dweud nad oes cynlluniau i’r ŵyl gael ei symud i’r fferm.

Pennaeth a pherchennog yr ŵyl yw Fiona Stewart, fu’n ymgynghorydd i’r Cyngor Prydeinig a’r Swyddfa Dramor mewn swyddi blaenorol.

Mae’n cyflogi 200 o bobol yn llawn amser, tra bod 5,000 o weithwyr eraill yn gweithio i’r ŵyl, naill ai dros dro neu’n wirfoddol.

Ers hynny, daeth i’r amlwg ar ôl i’r llywodraeth brynu’r fferm eu bod yn dal i aros i ŵyl Fiona Stewart gyflwyno cynllun busnes llawn.

Roedd awgrym nad oedd Llywodraeth Cymru wedi derbyn unrhyw gyngor gan gwmnïau na sefydliadau yn y diwydiant cerddoriaeth cyn prynu’r fferm, ond maen nhw’n dweud bod Cymru Greadigol wedi rhoi cyngor ar y mater.

Roedd ymchwiliad wedi cael ei lansio gan y gwasanaeth sifil hefyd i ginio lle’r oedd dau weinidog, Jeremy Miles a Julie James, yn bresennol ynghyd â phennaeth yr ŵyl, Fiona Stewart, yng nghartref Cathy Owens, lobïwr a phennaeth cwmni Deryn, sy’n cynrychioli Gŵyl y Dyn Gwyrdd.

Yr wythnos ddiwethaf, dywedodd Archwilydd Cyffredinol Cymru, Adrian Crompton, fod gweinidogion wedi gweithredu gyda “phrysurdeb” i brynu’r fferm, ac nad oedd swyddogion “yn cadw cofnod o faterion gafodd eu trafod” gyda’r cwmni, mewn cyfarfodydd.

Fodd bynnag, mae Llywodraeth Cymru yn mynnu bod adroddiad yr archwilydd yn dweud yn glir bod y broses gaffael wedi dilyn “prosesau priodol” ac yn “werth am arian”.

Ddylai Llywodraeth Cymru “fyth fod wedi ymyrryd yn y lle cyntaf”

“Dydw i ddim yn meddwl ei fod yn ddefnydd da o adnoddau,” meddai Mike Hedges.

“Mae gennym ni bethau y gallwn ni eu gwneud gyda’r math yna o arian.

“Dydw i ddim yn credu y dylai Llywodraeth Cymru fod yn ariannu prosiectau twristiaeth.

“Faint mae gwyliau cerddorol o gwmpas Prydain yn ei dderbyn gan awdurdodau lleol neu Lywodraeth San Steffan?

“Mae’r bobol yma yn ei redeg e – maen nhw’n gwneud arian ac maen nhw’n ei redeg e fel menter fasnachol.

“Dwi’n meddwl ei bod hi’n hen bryd i rai sefydliadau benderfynu os ydyn nhw’n fasnachol neu beidio.”

Ychwanegodd Mike Hedges na ddylai Llywodraeth Cymru “fyth fod wedi ymyrryd yn y lle cyntaf”.

“Polisi economaidd sy’n dilyn hoel traed Gwlad Groeg”

“Os yw’r Dyn Gwyrdd eisiau ei phrynu, does gen i ddim problem gyda’i gwerthu i’r Dyn Gwyrdd am y pris wnaethon ni ei dalu,” meddai wedyn.

“Un o fy mhryderon gwirioneddol yng Nghymru yw ein hobsesiwn gyda ffermio a thwristiaeth.

“Mae’n ymddangos nad ydyn ni’n sylweddoli nad nhw yw’r diwydiannau sy’n eich gwneud chi’n gyfoethog.

“Bron bod gennym bolisi economaidd sy’n dilyn ôl traed Groeg, ein bod yn ceisio efelychu hynny.”

Cymru

Dim modd “ymddiried yn Llafur gydag arian cyhoeddus”, yn ôl y Ceidwadwyr Cymreig

“Mae pob diweddariad ar y stori hon yn drewi, mae’r holl beth yn drewi,” meddai Andrew RT Davies
golwg+
Cyfoes

“Rhywbeth yn drewi” – beirniadu prynu fferm am £4.25m i gynnal gŵyl roc

Huw Bebb

“Pa fudd sydd yn mynd i fod i’r gymuned? Pa fudd sy’n mynd i fod i’r pwrs cyhoeddus? Pa fudd fydd yna i amaethyddiaeth?”
Arian a Busnes

Rhagor o gwestiynau i’w hateb ynghylch Gŵyl y Dyn Gwyrdd, medd y Ceidwadwyr Cymreig

Mae sylwadau rheolwr gyfarwyddwr yr ŵyl yn wahanol i rai un o weinidogion Llywodraeth Cymru, meddai’r blaid