Mi fydd hi’n “noson emosiynol” yng Nghlwb Hwylio Caernarfon nos Sadwrn (Gorffennaf 9) pan fydd gig er cof am Dyfrig Evans yn cael ei chynnal.

Bu farw’r actor a cherddor yn 43 oed ym mis Mai, a bu sawl un o’i gyfoedion yn talu teyrnged iddo.

Mae’r gig yn rhan o arlwy Gŵyl Arall sy’n cael ei chynnal yn y dref dros y penwythnos.

Ymhlith y bandiau sy’n chwarae mae Orinj, Maes Parcio, Elis Derby a Daf Palfrey.

Mae’r band Maes Parcio yn cynnwys Twm, mab Dyfrig.

Bydd y gig yn cychwyn am hanner awr wedi saith a bydd holl elw’r noson yn cael ei roi i elusen Ymchwil Canser, ac mae’r tocynnau i gyd eisoes wedi eu gwerthu.

“Noson emosiynol”

Roedd Dyfrig Evans mewn band roc poblogaidd o’r enw Topper gyda’i frawd Iwan.

Fe gafodd Iwan gais i helpu gyda threfnu’r gig goffa.

“Mae o’n beth neis eu bod nhw wedi meddwl amdano fo,” meddai Iwan wrth golwg360.

“Ddaru nhw gysylltu efo fi’r wythnos diwethaf yn gofyn a fyswn i’n meindio tasa nhw’n cynnal noson er cof amdano fo a gofyn a oeddwn i eisiau helpu i drefnu.

“Yn amlwg, wnes i ddweud: ‘Wrth gwrs’.

“Felly ia, mae o’n beth neis bod nhw wedi meddwl amdano fo, ac wrth gwrs eu bod nhw am roi’r elw i gyd i Cancer Research.

“Dw i’n gwybod bod hen griw Topper yn mynd i fynd draw a lot o hen ffrindiau a ballu.

“Mi fydd hi’n noson emosiynol.”

“Mae o’r un sbit â Dyfrig”

Roedd sicrhau bod mab Dyfrig Evans yn chwarae gyda’i fand Maes Parcio yn y gig yn bwysig i Iwan Evans.

“Bendant, gan fod Twm yn y band ro’n i’n meddwl ei fod o’n bwysig bod o’n rhan ohono fo,” meddai.

“Mi fasa Dyfrig wrth ei fodd tasa fo’n gwybod bod ei fab yn gwneud gig.

“Chafodd o erioed gyfle i glywed nhw’n chwarae felly wnes i gysylltu efo Twm, a gofyn a fysa nhw awydd ei wneud o, ac yn amlwg mi’r oedden nhw.

“Mi fydd hi’n neis gweld Twm ar y llwyfan, mae o’r un sbit â Dyfrig, mae o bach yn scary pan ti’n sbïo arno fo.

“Ond na, dw i’n falch bod ni wedi llwyddo i’w cael nhw i chwarae.”

Teyrngedau i “ffrind annwyl”, Dyfrig Evans

“Roedd o’n rhoi coflaid pan oeddwn i angen ac roeddwn i yno i ddal ei law e,” meddai’r DJ Gareth Potter

Diolch Dyfrig

Manon Steffan Ros

“Tra pery’r gân a’r gair a’r wên glên yn ein meddyliau, mae’r hen fyd yma’n lle gwell, am fod Dyfrig wedi bod yma”