Heno am wyth mi fydd S4C yn dangos rhaglen deyrnged “am wychder” Dyfrig Evans, y cerddor a’r actor amryddawn fu farw yn 43 oed nôl ym mis Mai.
Ar y rhaglen Dyfrig mae Bryn Fôn yn sôn am ddoniau actio Dyfrig Evans.
Bu i’r ddau o Ddyffryn Nantlle actio gyda’i gilydd mewn sawl drama deledu gan gynnwys Talcen Caled, Tipyn o Stad a Stad.
Wnaethon nhw hefyd actio dau frawd mewn sioe glybiau o’r enw Yr Alamo i Theatr Bara Caws.
Fel hyn mae Bryn Fôn yn disgrifio Dyfrig Evans:
“Dyn gwyllt o’r coed un munud, ac wedyn plentyn bach diniwed, amddifad wedyn, eisiau dy help di. Roedd o jesd yn newid.”
Ac mae Bryn Fôn yn cofio’r cyfeillgarwch ar set Talcen Caled, rhwng Dyfrig Evans a’i gyd-actor Stewart Jones:
“Dau o hogiau drwg. Mor debyg i’w gilydd. Tynnu ar ei gilydd. Dweud pethau ofnadwy wrth ei gilydd. Roedd [Dyfrig] yn addoli Stew.”
Ac mae Bryn Fôn yn datgelu bod Dyfrig Evans yn ddyn sâl pan wnaeth o ffilmio’r ddrama Stad y llynedd.
“Roedd y newyddion wedi dod wrth gwrs bod o ddim yn dda,” cofia Bryn Fôn, “a rhywun ddim yn siŵr faint oedd o’n mynd i allu’i wneud.
“Ond roedd o’n benderfynol bod o eisiau bod yn y gyfres.”
Mae Bryn Fôn yn llawn edmygedd o allu Dyfrig Evans i barhau i actio yn Stad, ac yntau o flaen y camerâu a dan gwmwl ei salwch.
“Perfformiad anhygoel… cael ad-libio a dweud pethau off top ei ben, a reit arni o ran beth oedd ei angen ar y pryd.”
Dyma flas o eiriau Bryn Fôn a pherfformiad Dyfrig Evans yn Stad:
Llais Dadi Mochyn
Hefyd ar y rhaglen mae’r actores Catrin Mara yn sôn am allu Dyfrig Evans i droi ei law at leisio rhaglenni plant.
Dyfrig Evans oedd yn lleisio cymeriad ‘Dadi Mochyn’ yn y fersiwn Gymraeg o Peppa Pig i S4C.
“Roedd o’n gallu creu cymeriad heb fawr o ymdrech,” meddai Catrin Mara.
Ac mae actores arall yn talu teyrnged i’w alluoedd.
Bu Fflur Medi Owen yn actio gyda Dyfrig Evans ar y gyfres gomedi Darren Drws Nesa.
“Roedd Dyfs yn gallu gwneud sgript gymharol… yn wych. Ei delifro hi yn wych,” meddai Fflur Medi Owen.
“Fo wnaeth y gyfres yna [Darren Drws Nesa]. Roedd o’n wych.”
Dyfrig y cerddor
Roedd Dyfrig Evans yn ganwr a gitarydd gwych, a daeth i gael ei adnabod fel Dyfrig ‘Topper’ o ganlyniad i boblogrwydd ei fand, Topper.
Wrth gyflwyno’r rhaglen Dyfrig heno, mae Huw Stephens yn sôn am weld Topper yn cefnogi Gorky’s Zygotic Mynci a’r Super Furry Animals yn y 1990au.
“Roeddwn i, fel gymaint o bobl, yn ffan enfawr o Topper,” meddai Huw Stephens.
“Wnaeth [Dyfrig] greu cymaint yn ystod ei fywyd, fel actor, fel cerddor, fel perfformiwr.”
Archif ddifyr
Fel y byddech yn disgwyl, mae yna glipiau difyr o yrfa Dyfrig Evans ar deledu i’w gweld ar y rhaglen heno.
Mae yna glip o’i ymddangosiad cyntaf ar deledu, yn actio fersiwn ifanc o frawd Arthur Picton ar raglen C’Mon Midffîld, mewn flashback o blentyndod y ddau Bicton bach.
Hefyd mae yna glip ohono yn perfformio monolog ar lwyfan yr Eisteddfod Genedlaethol yn 1996, pan enillodd Wobr Richard Burton y flwyddyn honno.
Hefyd mae yna glipiau o Dyfrig Evans yn nyddiau cynnar Rownd a Rownd, a fideos ohono gyda’i fandiau Paladr a Topper.
Dyma golofn gan Manon Steffan Ros, a ymddangosodd yng nghylchgrawn Golwg yn dilyn marwolaeth Dyfrig Evans
Diolch Dyfrig
