Bydd y Prif Weinidog Mark Drakeford yn dathlu degfed pen-blwydd Llwybr Arfordir Cymru drwy ymweld â gwirfoddolwyr a cherddwyr yn Sir Fynwy heddiw (dydd Mercher, Mai 11).
Er mwyn dathlu degawd, mae rhaglen o ddigwyddiadau a gweithgareddau blwyddyn o hyd sy’n dathlu’r llwybr, gan gynnwys gwyliau cerdded, heriau rhithwir a gosodiadau celf.
Mae’r llwybr 870 milltir yn tywys cerddwyr ar hyd holl arfordir Cymru, gan fynd heibio cant o draethau ac 16 castell.
Mae’r llwybr yn un o “ogoniannau Cymru ac yn un o lwyddiannau mawr datganoli”, meddai Mark Drakeford.
“Hoffwn ddiolch i bawb sy’n ymwneud â rheoli’r llwybr.
“Yn enwedig y staff a’r gwirfoddolwyr, sydd allan ym mhob tywydd, yn gweithio’n galed i gynnal y llwybr i safonau mor uchel,” meddai.
“Pe bai’n rhaid i mi ddewis fy hoff ddarn o’r llwybr, byddai’r gyfran rhwng Pentywyn ac Amroth yn dod yn agos: gan ddechrau yn fy sir enedigol, sir Gaerfyrddin, a dod i ben yn Sir Benfro.
“Efallai nad dyma’r rhan fwyaf adnabyddus o’r llwybr, ond mae’n cynnig amrywiaeth enfawr: rhai dringfeydd heriol, amrywiaeth eithriadol o flodau, cilfachau cudd a digon o ddiddordeb hanesyddol”.
Mae Llywodraeth Cymru yn bwriadu adeiladu ar lwyddiannau’r deng mlynedd gyntaf fel y gall mwy o bobol fwynhau’r llwybr, o fwy o gefndiroedd, yn haws, a chyda mwy o fanteision i gymunedau lleol, busnesau, a’r amgylchedd.
Mae adolygiad, dan arweiniad Huw Irranca-Davies, wedi cael ei gynnal o’r Llwybr, a bydd adroddiad y grŵp wedi cael ei gyhoeddi heddiw.
Llwybr Arfordir Cymru yn dathlu deg oed
Llwybr hiraf Cymru – 870 o filltiroedd! – yn dathlu’r deg
