Creu rôl arbennig ar gyfer ffermio ar Gyngor Sir Benfro

Fe fydd rôl arbennig yn cael ei chreu ar gyfer dirprwy arweinydd Cyngor Sir Benfro, yn dilyn galwadau i’r Cyngor llawn – y tro cyntaf i rôl o’r fath gael ei chreu ar gyfer uwch swyddog.

“Gyda’r newidiadau diweddar i’r Gyllideb gan Lywodraeth Lafur y Deyrnas Unedig ar y Dreth Etifeddiant a Rhyddhad Eiddo Amaethyddol, mae nifer o ffermwyr Sir Benfro yn teimlo’n bryderus am ddyfodol eu ffermydd teuluol, a nifer ohonyn nhw yn Sir Benfro wedi bod yn yr un teulu ers cenedlaethau,” meddai’r Cynghorydd Di Clements, arweinydd y Grŵp Ceidwadol, wrth holi’r Cynghorydd Jon Harvey, arweinydd y Cyngor, yn ystod cyfarfod Rhagfyr o Gyngor Llawn Sir Benfro.

“Dw i wedi’i chael hi’n siomedig yn yr holl flynyddoedd dw i wedi bod yn gynghorydd, gyda chyyfraniad mawr ffermio at les economaidd, diwylliannol ac amgylcheddol y sir, na fu yna deitl Materion Gwledig, Ffermio nac Amaeth ar gyfer Aelod Cabinet.

“Er mwyn dangos bod y Cyngor hwn yn cydnabod pwysigrwydd amaeth, a’r cannoedd o filoedd o bunnoedd sy’n cael ei gynhyrchu gan ffermio, a fydd yr arweinydd yn ystyried ei gynnwys yn un o deitlau portffolio Aelodau ei Gabinet?”

‘Hanfodol bwysig’

“Dw i’n rhannu eich persbectif yn llwyr,” meddai’r Cynghorydd Jon Harvey wrth ateb.

“Mae’n wir na fu gan y Cyngor erioed Aelod Cabinet â’r rôl yma.

“Fodd bynnag, galla i ailystyried, a dw i’n ystyried pob agwedd ar fywyd gwledig yn hanfodol bwysig.”

Dywedodd wrth aelodau fod ffermio a materion gwledig yn dod o dan bortffolio’r dirprwy arweinydd Paul Miller.

“Rydyn ni oll yn ymwybodol o’r agweddau newidiol ar fywyd gwledig ar hyn o bryd,” meddai.

“Mae gennym ni bencampwr materion gwledig, y Cynghorydd Steve Alderman, ond dw i wedi cael sgwrs â’r dirprwy arweinydd ac wedi cytuno i adolygu’r teitl hwn er mwyn adlewyrchu pwysigrwydd y rôl, a byddaf yn hapus i wneud cyhoeddiad dros y dyddiau nesaf.”