Mae’r Ceidwadwyr Cymreig yn cyhuddo Llywodraeth Cymru o ragrith wrth beidio â gweithredu i ddiogelu hen domenni glo yn y cymoedd.
Daw hyn yn sgil honiadau yr wythnos yma y gallai Llywodraeth Cymru fod wedi gwrthod cyllid atgyweirio i domen lo yn Tylorstown yn 2014 gan nad oedd ‘achos busnes’ dros ddatblygu’r tir i ddibenion proffidiol.
Dyma’r ardal lle bu tirlithriad yn dilyn llifogydd ddwy flynedd yn ôl, ac mae dadlau parhaus wedi bod rhwng llywodraethau Cymru a Phrydain ynghylch pwy ddylai dalu am glirio hen domenni glo ledled y cymoedd.
“Mae rhagrith y Llywodraeth Lafur yng Nghaerdydd yn anhygoel,” meddai Gweinidog Gwrthblaid y Ceidwadwyr Cymreig ar Newid Hinsawdd, Janet Finch Saunders.
“Unwaith eto maen nhw’n dweud un peth a gwneud yn gwbl groes i hynny, y tro yma gyda thomenni glo peryglus.
“Mae’n ymddangos eu bod wedi rhoi elw o flaen diogelu cymunedau er gwaethaf y rhethreg diweddar rydym wedi’i glywed gan weinidogion.
“Mae Llafur wedi bod mewn grym ers dau ddegawd ac wedi cael digon o gyfle i ddiogelu pobl a chymunedau trwy wneud y tomenni glo hyn yn saff, ond yn lle hynny maen nhw’n beio pobl eraill.
“Eu cyfrifoldeb nhw a neb arall yw atgyweirio’r tomenni hyn – a does dim mwy o esgusodion gan y gall bywydau fod y fantol.”
Galwadau pellach ar Lywodraeth y Deyrnas Unedig am gyllid i fynd i’r afael â thomenni glo peryglus
