Mae record Llafur ar ddiogelu a hyrwyddo treftadaeth a diwylliant Cymru yn “druenus ac yn hynod siomedig”, yn ôl Aelod Plaid Cymru o’r Senedd dros Arfon, Siân Gwenllian, wrth i’r blaid gyhuddo Llywodraeth Cymru o dangyllido’r Llyfrgell Genedlaethol.
Mae angen tua £1.5m ar y Llyfrgell er mwyn osgoi toriadau pellach i swyddi staff a gwasanaethau, ar ôl i’r £200,000 o’r £250,000 a gafodd yn ddiweddar gael ei gymryd yn ôl gan Lywodraeth Cymru oherwydd y pandemig.
Mae Llywodraeth Cymru bellach wedi cyhoeddi pecyn ariannu newydd gwerth £2.25m.
Mae deiseb ar-lein sy’n galw am gyllid teg i’r Llyfrgell wedi casglu bron i 14,000 o lofnodion.
Dywed Siân Gwenllian fod y Llyfrgell Genedlaethol yn “rhan sylfaenol o fywyd diwylliannol, addysg a hanes Cymru” a bod “blynyddoedd o doriadau ariannol wedi ei gadael ar ei gliniau”.
“Mae’r gyllideb ddrafft ddiweddaraf yn dangos nad oes gan y Llywodraeth Lafur hon unrhyw ddiddordeb mewn sicrhau hyfywedd ariannol hirdymor un o’n sefydliadau cenedlaethol mwyaf gwerthfawr,” meddai
“Fe wnaethon nhw eu hunain gomisiynu adolygiad wedi’i deilwra o’r Llyfrgell a oedd yn argymell y dylid rhoi sylw brys i anghenion ariannol y Llyfrgell ac roedd y sefyllfa ariannu bresennol yn anghynaladwy.
“Rhaid i Lywodraeth Cymru adolygu ar frys y cyllid annigonol a ddyrennir i’r Llyfrgell Genedlaethol a darparu setliad ariannu cynaliadwy i’r Llyfrgell Genedlaethol a fydd yn diogelu gweithlu heddiw ac yn caniatáu i’r llyfrgell ehangu ei gwaith hanfodol ar gyfer y dyfodol.”
Y Llyfrgell Genedlaethol wedi dioddef o ’dangyllido systematig’ medd AoS ac AS Ceredigion
“Rhaid inni beidio anwybyddu ein hunain”
