Bydd prifysgolion yng Nghymru yn parhau i addysgu ar-lein tan y Pasg.
Mae Prifysgolion Cymru wedi cadarnhau mai dim ond nifer fach o gyrsiau ymarferol neu gyrsiau iechyd fydd yn cael eu haddysgu wyneb yn wyneb cyn hynny.
Daeth mwyafrif o ddysgu wyneb yn wyneb i ben ym Mhrifysgolion Cymru cyn y Nadolig.
Fe gynghorwyd myfyrwyr bryd hynny i ddychwelyd i brifysgolion ychydig cyn i addysgu wyneb yn wyneb ailddechrau, roedd hynny i fod i ddigwydd yn wreiddiol ddechrau fis Chwefror.
Dydy Llywodraeth Cymru heb amlinellu unrhyw gynlluniau eto i adael i fyfyrwyr ddychwelyd dros y Pasg.
‘Rhoi sicrwydd i fyfyrwyr’
Eglurodd llefarydd ar ran Prifysgolion Cymru fod y penderfyniad wedi ei wneud er mwyn “rhoi sicrwydd i fyfyrwyr”.
“Mae’n bwysig nodi bod myfyrwyr ar ystod o gyrsiau eisoes wedi dychwelyd i addysgu wyneb yn wyneb, gan gynnwys llawer o gyrsiau â gofynion ymarferol,” meddai.
“Rydym yn rhagweld y bydd nifer fach o fyfyrwyr ychwanegol yn dychwelyd i gampysau cyn y Pasg lle mae angen iddynt gael mynediad at gyfleusterau ac adnoddau.
“Gall myfyrwyr a fydd yn defnyddio cyfleusterau neu adnoddau dysgu ar y campws yn ystod yr wythnosau nesaf fod yn hyderus bod ein campysau yn parhau i fod yn amgylcheddau diogel, sydd a’r rheolau ymbellhau’n gymdeithasol a phrotocolau glanhau trwyadl.
“Cyn bo hir, bydd prifysgolion yn cysylltu gyda myfyrwyr i roi gwybod am y cynlluniau newydd.
“Rydym yn cydnabod bod hwn yn gyfnod anodd i bawb. Mae lles myfyrwyr a staff yn parhau i fod yn flaenoriaeth allweddol i brifysgolion yng Nghymru a byddem yn annog unrhyw fyfyriwr sy’n cael anawsterau neu galedi i siarad â’u sefydliad.”
“Pan mae pobol yn talu lot o bres am rhywbeth, mae angen bod fymryn yn fwy teg hefo nhw”
