Mae myfyrwyr ym mhrifysgolion Caerdydd, Abertawe a Bangor, yn bwriadu cynnal streic rhent.
Mae’r ymgyrchwyr o’r farn nad yw myfyrwyr wedi cael yr hyn dalwyd amdano gan nad oes modd iddyn nhw ddychwelyd i’r brifysgol oherwydd y coronafeirws.
Er bod y prifysgolion wedi cynnig ad-daliad mae rhai myfyrwyr yn parhau yn anfodlon a’r cynigion.
Yn sgil y cyfyngiadau teithio bydd y protestiadau yn cael eu cynnal ar lein, ac mae’r ymgyrchoedd yn annog myfyrwyr i wrthod talu rhent a chanslo eu debyd uniongyrchol.
Ad-daliadau sydd ar gael gan brifysgolion yng Nghymru
Yn wreiddiol, roedd disgwyl i fyfyrwyr ddychwelyd i’r brifysgol yn raddol ar ôl y Nadolig, ond mae prifysgolion yng Nghymru wedi penderfynu oedi dysgu wyneb yn wyneb, ac eithrio cyrsiau sy’n gysylltiedig ag iechyd.
Er y bydd dysgu ar lein yn parhau mae Prifysgolion Caerdydd, Abertawe ac Aberystwyth wedi dweud y byddan nhw’n cynnig ad-daliad am bob wythnos nad yw myfyrwyr yn defnyddio eu llety.
Yn y cyfamser mae Prifysgol Bangor yn bwriadu cynnig ad-daliad o 10% ac mae Prifysgol Fetropolitan Caerdydd hefyd yn bwriadu cynnig ad-daliad.
Fodd bynnag, mae Prifysgol De Cymru a Phrifysgol Wrecsam eisoes wedi dweud na fyddan nhw’n cynnig ad-daliad.
Rhagor o brifysgolion yn cynnig ad-daliad am lety myfyrwyr.
‘Talu am lety na fyddant yn ei ddefnyddio’
Mae Undeb Myfyrwyr Cenedlaethol Cymru wedi galw ar brifysgolion a landlordiaid preifat i gydweithio â Llywodraeth Cymru.
“Mae llawer o fyfyrwyr bellach yn wynebu’r posibilrwydd o dalu cannoedd o bunnoedd o rent am lety na fyddant yn ei ddefnyddio tan ganol mis Chwefror ar y cynharaf,” meddai Becky Ricketts, Llywydd Undeb Myfyrwyr Cenedlaethol Cymru.
“Rydym yn galw ar Lywodraeth Cymru, prifysgolion a landlordiaid preifat i weithio i ddigolledu’r myfyrwyr hynny sydd, drwy aros gartref, yn cadw Cymru’n ddiogel.
“Mae myfyrwyr wedi wynebu caledi ariannol ychwanegol ers mis Mawrth diwethaf oherwydd diffyg swyddi rhan-amser, felly byddai gwneud iddyn nhw dalu am wasanaethau na allant eu defnyddio yn ergyd arall iddynt.”
Yn ôl Llywodraeth Cymru “mater i sefydliadau neu landlordiaid unigol yw cytundebau rhentu”.
Darllen mwy
