Mae Llywodraeth Cymru wedi cyhoeddi cynlluniau er mwyn i fyfyrwyr allu dychwelyd i brifysgolion Cymru ar ôl gwyliau’r Nadolig.
Bydd myfyrwyr yn cael eu gwahodd i ddychwelyd dros gyfnod o bedair i bum wythnos, gan ddechrau o Ionawr 11.
Yna bydd myfyrwyr yn dychwelyd yn raddol i addysgu wyneb yn wyneb.
Dau brawf opsiynol ar ôl dychwelyd
Bydd rhaglen ‘profion llif unffordd’ ym mhrifysgolion Cymru yn ailgychwyn yn y flwyddyn newydd, er mwyn galluogi myfyrwyr i ddychwelyd yn ddiogel.
Bydd myfyrwyr yn cael eu hannog i gymryd dau brawf ac osgoi cyfarfod i gymdeithasu am dri diwrnod ar ôl dychwelyd.
Os na fydd myfyrwyr yn dymuno cael prawf bydd gofyn iddynt leihau eu cysylltiadau a pheidio cymysgu ag eraill am 14 diwrnod.
‘Torri’r gadwyn drosglwyddo’
“Rydym yn rhoi’r mesurau hyn ar waith i sicrhau hyder wrth ddychwelyd i ddysgu wyneb yn wyneb ac i leihau’r risg y bydd angen i nifer fawr o fyfyrwyr hunanynysu yn ystod y tymor,” meddai Kirsty Williams, y Gweinidog Addysg.
“Bydd y rhaglen profion unffordd hefyd yn allweddol er mwyn ailddechrau dysgu’n ddiogel ar y campws.
Bydd dychwelyd fesul cam, mewn ffordd sy’n cael ei rheoli, yn helpu i ateb y galw fel y gall pob myfyriwr gael dau brawf.
“Bydd hyn yn helpu i dorri’r gadwyn drosglwyddo gan y bydd modd i unrhyw un sy’n heintus heb wybod hynny hunanynysu a lleihau’r risg o drosglwyddo’r feirws i eraill.”
Prifysgolion Lloegr
Mae’r cynlluniau yn dilyn cyhoeddiad y bydd myfyrwyr yn Lloegr yn cael cynnig prawf wrth ddychwelyd i brifysgolion yno.
Ond yn wahanol i Gymru, yn Lloegr bydd gofyn i fyfyrwyr sydd wedi’u blaenoriaethu ddychwelyd rhwng Ionawr 4 – 18, ac yna’r gweddill yn ystod y bythefnos ganlynol.
