Mae Joe Allen, chwaraewr canol cae Cymru, wedi ymddeol o gemau pêl-droed rhyngwladol yn 32 oed.
Chwaraeodd e 74 gwaith dros Gymru, gan helpu’r garfan i gymhwyso ar gyfer Ewro 2016 a 2020, a Chwpan y Byd y llynedd.
Chwaraeodd e yn y gêm yn erbyn Portiwgal yn rownd gyn-derfynol yr Ewros yn 2016, a chwarae ei ran hefyd yn ymgyrch y tîm yn y gystadleuaeth yn 2021 pan gyrhaeddodd Cymru’r ail rownd.
Wrth gyhoeddi ei ymddeoliad, dywed ei fod wedi bod yn “hynod ffodus” i gael chwarae dros ei wlad.
Daw’r cyhoeddiad fis ar ôl i un o sêr eraill Cymru, y capten Gareth Bale, gyhoeddi ei ymddeoliad.
“Rwyf wedi bod yn hynod o ffodus yn fy mywyd i gael chwarae dros Gymru,” meddai Joe Allen, sy’n chwarae i Glwb Pêl-droed Abertawe.
“Mae’r daith wedi bod yn un anhygoel ac rwyf wedi ei rhannu â phobol arbennig iawn: fy nheulu, cyd-chwaraewyr, staff a chefnogwyr; pob un wedi cyfrannu i’w gwneud yn daith eithriadol.
“Rwyf yn ddiolchgar i bob un ohonoch.
“Roedd y gefnogaeth gan Gymry oll yn ysbrydoliaeth a roddodd falchder pur i mi bob tro wrth wisgo’r crys. Bu cymaint o brofiadau bythgofiadwy.
“Yn anffodus, oherwydd anafiadau, daeth diwedd cyfnod ac mae’n amser i roi cyfle i’r genhedlaeth nesaf fwrw ymlaen.
“Mae dyfodol pêl-droed Cymru yn ddisglair.”
Rydym wedi dymchwel y wal dalu ar y cyfweliad hwn â Joe Allen adeg ei drosglwyddiad yn ôl i Abertawe ar drothwy Cwpan y Byd:
