Bydd S4C yn dangos llai o’r gyfres Rownd a Rownd oherwydd effaith covid.
Dim ond un bennod wythnosol fydd i’w gweld, yn hytrach na’r ddwy arferol, a hynny wedi i’r criw cynhyrchu cwmni teledu Rondo orfod gohirio ffilmio yn dilyn achosion o covid ymysg y staff.
Dywedodd y cynhyrchwyr ar Twitter bod Covid “wedi cael effaith ar ein hamserlen ffilmio felly er mwyn ein cadw ni ar y sgrin cyn hired â phosib, ‘da ni’n torri’r penodau i lawr o 2 i 1 yr wythnos. Diolch am eich cefnogaeth yn ystod y cyfnod digynsail hwn.”
Wel gyfeillion, yn anffodus mae Covid wedi cael effaith ar ein hamserlen ffilmio felly er mwyn ein cadw ni ar y sgrin cyn hired â phosib, ‘da ni’n torri’r penodau i lawr o 2 i 1 yr wythnos. Diolch am eich cefnogaeth yn ystod y cyfnod digynsail hwn ?
— Rownd a Rownd (@rowndarownd) March 11, 2021
Cefndir
Mae’r gyfres boblogaidd wedi ei ffilmio yn Ynys Môn ers 25 mlynedd, ond oherwydd y sefyllfa yn ymwneud a Covid-19 bu’n rhaid adeiladu setiau pwrpasol newydd yn Llangefni ac yng Nghaernarfon y llynedd.
Bu’n rhaid gohirio ffilmio’r gyfres fis Mawrth y llynedd yn sgil y coronafeirws, cyn ailddechrau fis Awst.
Yna, bu’n rhaid gohirio ffilmio ddwywaith ym mis Chwefror eleni ar ôl i achosion o Covid-19 gael eu cofnodi yn swyddfa’r cwmni teledu sy’n cynhyrchu’r gyfres, Rondo.
Mae’r Awdurdod Gweithredol Iechyd a Diogelwch wedi cadarnhau bod eu swyddogion yn rhan o ymchwiliad i achosion diweddar o’r coronafeirws yn safle cwmni Rondo Media yng Nghibyn, ger Caernarfon.
Bu farw Huw Gethin Jones, golygydd gyda chwmni teledu Rondo, oedd yn 34 oed ac yn dod o Ynys Môn, yn sgil cymhlethdodau’n ymwneud â Covid-19 ym mis Chwefror.
