Mae Andrew RT Davies yn dweud ei fod yn “falch” bod Trysorlys y Deyrnas Unedig wedi “gwrthod” cais Llywodraeth Cymru am gyllid pellach i fynd i’r afael â’r pandemig.
Mae arweinydd y Ceidwadwyr Cymreig yn dweud bod y penderfyniad gan Lywodraeth Boris Johnson wedi atal Mark Drakeford rhag gweithredu “agenda sosialaidd wrth-wyddoniaeth”.
Mae Prif Weinidog Cymru eisoes wedi dweud bod gallu Cymru i gyflwyno cyfyngiadau pellach i ymdrin ag effeithiau Omicron wedi ei gyfyngu gan y Trysorlys, sy’n gyndyn i roi mwy o arian i Gymru.
Ychwanegodd Mark Drakeford nad yw hi’n “deg” fod gweinidogion sy’n gwneud penderfyniadau ar gyfer Lloegr yn gwybod y byddai arian ar gael tra nad oedd yr un peth yn wir yng Nghymru.
‘Falch iawn’
Fe gyfeiriodd Andrew RT Davies at effaith y pandemig ar restrau aros am driniaethau canser.
“Ni allwn barhau â rhestrau aros cynyddol a diagnosisau canser a gollwyd,” meddai.
“Ni allwn barhau â busnesau sy’n gorfod cau gan eu gorfodi i droi at y wladwriaeth am gymorth, oherwydd gwyddom faint o sosialwyr sydd wrth eu bodd yn cael pobl yn nwylo’r wladwriaeth.
“Yr wyf yn falch iawn bod y Trysorlys wedi gwrthod cytuno i gais [Mark] Drakeford eu bod yn ariannu ei agenda sosialaidd wrth-wyddoniaeth.
“Yn wir, mor gryf yw gwrthwynebiad Llafur Cymru i fusnes preifat fel bod gan eu gweinyddiaeth reol lle gallwch gael dirwy am fynd i’r gwaith ond gallwch eistedd yn y dafarn drwy’r dydd a gwylio’r teledu.”
“I’r rhai sydd heb wneud hynny eto, byddwn yn argymell yn gryf bod darllenwyr yn edrych ar erthygl Sajid Javid yn y Daily Mail o fis Rhagfyr ymlaen,” meddai Andrew RT Davies wedyn.
“Dywedodd yr Ysgrifennydd Iechyd [yn Lloegr], a hynny’n briodol, fod cyfyngu ar ein rhyddid fod yn ddewis olaf, ac ychwanegodd fod pobl Prydain yn disgwyl i wleidyddion wneud popeth y gallant ei wneud i’w hosgoi.”
Fis Hydref 2020, fe wnaeth Trysorlys y Deyrnas Unedig wrthod cais gan Mark Drakeford i ymestyn y cynllun ffyrlo i Gymru pan aeth y wlad i gyfnod atal byr.
Cafodd y cynllun ffyrlo ei ymestyn yn ddiweddarach yng Nghymru ar ôl i Loegr fynd i gyfnod clo ei hun.
Llywodraeth Cymru yn “edrych” ar y posibilrwydd o lacio cyfyngiadau Covid-19
