Pwyllgorau Senedd Cymru yn galw am wrthwynebu Bil ôl-Brexit dadleuol

Mae tri o bwyllgorau’r Senedd wedi galw ar Aelodau i wrthwynebu mesur ôl-Brexit dadleuol.

Mae Llywodraeth San Steffan yn dadlau y bydd ‘Bil y Farchnad Fewnol’ yn sicrhau masnach lefn oddi fewn i’r Deyrnas Unedig wedi Brexit.

Ond mae llywodraethau Cymru a’r Alban wedi codi pryderon am y mesur, gan ddadlau y byddai’n cipio pwerau oddi wrthyn nhw.

Ar Ragfyr 1 mi fydd y Senedd yn pleidleisio tros roi ei chydsyniad i’r Bil, a bellach mae tri phwyllgor wedi galw ar i Aelodau wrthwynebu’r mesur.

Gwrthwynebiad

Ar ôl ystyried y Bil mae’r tri phwyllgor wedi dod at dri phrif gasgliad.

Mae’r Pwyllgor Materion Allanol a Deddfwriaeth Ychwanegol yn dadlau ei fod yn ffafrio buddiannau Lloegr mewn ffordd anghymesur.

Yn ôl y Pwyllgor Deddfwriaeth, Cyfiawnder a’r Cyfansoddiad byddai’n cael effaith uniongyrchol ar fywydau bob dydd dinasyddion Cymru.

Ac mae’r Pwyllgor Cyllid wedi dod i’r casgliad y byddai’n tanseilio pŵer Llywodraeth Cymru i wario.

“Lleihau pŵer y Senedd”

“Ni ellir anwybyddu barn Senedd Cymru ar fater cyfansoddiadol mor bwysig,” meddai David Rees, Cadeirydd y Pwyllgor Materion Allanol a Deddfwriaeth Ychwanegol

“Gallai Bil y Farchnad Fewnol wyrdroi dau ddegawd o waith ar ddatganoli os caiff ei basio.

“Rwy’n erfyn ar Lywodraeth y Deyrnas Unedig i beidio anwybyddu dymuniad y Senedd am y bydd y Bil hwn yn lleihau pŵer y Senedd a bydd yn lleihau effaith cyfreithiau sy’n cael eu gwneud yng Nghymru.”