Gwrthryfelwyr yn yr Wcrain
Mae cerbydau milwrol wedi cychwyn gadael ardaloedd o ddwyrain yr Wcráin sydd yn nwylo’r gwrthryfelwyr, yn ôl swyddogion.
Mae’n cael ei weld fel cam pwysig i weithredu’r cadoediad yn yr ardal, yn dilyn honiadau nad yw lefel y trais yno wedi gwella ers i’r cadoediad gael ei gyhoeddi ar 5 Medi.
Dywedodd y Cyrnol Andriy Lysenko, llefarydd ar ran Cyngor Diogelwch ac Amddiffyn yr Wcráin, fod lluoedd Kiev wedi cychwyn gadael.
Ychwanegodd fod cerbydau’r gwrthryfelwyr, sy’n gefnogol i Rwsia, wedi dechrau cilio hefyd.
Mae tua 3,000 o bobol wedi cael eu lladd ers i’r gwrthdaro ffyrnig ddechrau yn yr Wcráin ym mis Ebrill.
