Mae disgwyl i Sajid Javid roi datganiad am lacio cyfyngiadau Covid-19 yn Lloegr heddiw (dydd Llun, Mehefin 28).
Dyma’i ddatganiad cyntaf ers iddo fe ddychwelyd i Gabinet Llywodraeth Prydain yn Ysgrifennydd Iechyd yn San Steffan.
Wrth gael ei benodi dros y penwythnos, dywedodd ei fod e am i bobol gael dychwelyd i’r arfer “cyn gynted â phosib ac mor gyflym â phosib”.
Does dim disgwyl iddo fe lacio’r cyfyngiadau cyn Gorffennaf 19, ond mae’n hyderus na fydd rhaid gohirio y tu hwnt i’r dyddiad hwnnw.
Mae gweinidogion San Steffan wedi addo rhoi wythnos o rybudd cyn y bydd llacio pellach.
Mae lle i gredu bod yr Ysgrifennydd Iechyd yn fwy agored i lacio na’i ragflaenydd, oedd yn cael ei ystyried yn rhwystr i unrhyw lacio ac a oedd yn galw o hyd am ymestyn y cyfnodau clo yn ystod y pandemig.
‘Cyfrifoldeb enfawr’
Mae Sajid Javid eisoes wedi cydnabod fod gando fe “gyfrifoldeb enfawr” wrth ymgymryd â’r gwaith.
Yn ogystal â chyfyngiadau Covid, fe fydd yn rhaid iddo fe fynd i’r afael â diwygio’r Gwasanaeth Iechyd, rhestrau aros hir am driniaeth a chynllun gofal cymdeithasol y bu aros hir amdano.
Fe fydd e hefyd yn wynebu cwestiynau am gyflogau staff y Gwasanaeth Iechyd a’u blinder ar ôl cyfnod anodd yn ystod y pandemig.
Sajid Javid yw Ysgrifennydd Iechyd newydd San Steffan
