Graham Johnson
Mewn achos llys yn Llundain, mae cyn-newyddiadurwr gyda’r Sunday Mirror wedi cyfaddef hacio negeseuon ffôn actores mewn cyfres sebon.
Roedd Graham Johnson, 46, yn gweithio i’r Sunday Mirror rhwng 1997 a 2005 pan fu iddo hacio ffon er mwyn ymchwilio i honiadau fod yr actores yn cael perthynas yn 2001.
Nid yw hi’n hysbys pwy yw’r actores dan sylw.
Ymddangosodd Graham Johnson yn Llys Ynadon Westminster ar gyhuddiad o glustfeinio ar negeseuon ffôn heb awdurdod cyfreithiol, ond fe ddywedodd nad oedd yn ymwybodol fod hacio ffonau yn drosedd ar y pryd.
Dywedodd ei fod wedi rhoi’r gorau i glustfeinio ar y negeseuon ar ôl wythnos am nad oedd “yn teimlo ei fod yn iawn.”
Roedd wedi mynd at yr heddlu i gyfaddef ei fod wedi hacio ffonau ar ôl i newyddiadurwyr eraill o Mirror Group Newspapers gael eu harestio ynglŷn â’r un drosedd y llynedd.
Dywedodd y barnwr Quentin Purdy wrth Johnson nad oedd gan y llys bwerau digonol i ddelio gyda’r mater ac fe fydd Johnson yn cael ei ddedfrydu yn yr Old Bailey ar 27 Tachwedd.
Cafodd ei ryddhau ar fechnïaeth.
