Rhaid rhoi “chwarae teg” i weithwyr iechyd a gofal, medd Plaid Cymru

Mae Plaid Cymru wedi galw ar Lywodraeth Cymru i “gytuno i gyflogau uwch a gwell amodau” i weithwyr iechyd a gofal.

Dylai Llywodraeth Cymru weithredu ar alwadau undebau am gymorth lles ychwanegol i staff er mwyn gwella cyfraddau absenoldebau gan roi “chwarae teg” i’r holl weithwyr, meddai.

Dangosa ystadegau newydd fod cyfraddau absenoldebau o fewn y Gwasanaeth Iechyd wedi bod yn codi’n araf ers 2018, ac wedi cynyddu’n sylweddol yn ystod y pandemig.

Datgelodd yr ystadegau fod y gyfradd absenoldeb salwch uchaf o 8.4% ymhlith staff y Gwasanaeth Ambiwlans.

Daw hyn ymysg adroddiadau o flinder a straen, a phroblemau logisteg yn wynebu’r gwasanaeth a’i staff.

Fel rhan o ymgynghoriad gan undeb UNSAIN, mae gweithwyr iechyd yn cael dweud eu dweud ar gynlluniau Llywodraeth Cymru i gynnig codiad cyflog o 3% i weithwyr y Gwasanaeth Iechyd Gwladol ar hyn o bryd.

Gwella yn “ddramatig”

Dylai newidiadau fod yn “rhan o brosiect ehangach i wella’r sector iechyd a gofal yn ddramatig fel cyflogwr”, ychwanegodd Rhun ap Iorwerth AoS.

“Mae’n amlwg fod y gwasanaeth ambiwlans mewn argyfwng mewn sawl rhan o Gymru, a bod y pandemig wedi effeithio arnynt yn sylweddol,” meddai Rhun ap Iorwerth.

“Mae absenoldebau staff ar eu lefel uchaf erioed, gyda blinder a straen yn gyffredin a diffyg cefnogaeth ar gael.

“Rhaid i Lywodraeth Cymru gytuno i gyflogau uwch a gwell amodau gwaith i sicrhau bod gweithwyr yn medru parhau i weithio’n effeithiol a bod lefelau staff yn aros yn ddigon uchel.

“Dylai’r llywodraeth hefyd gweithredu ar alwadau gan undebau am gymorth lles ychwanegol,” ychwanegodd.

“Mae’n rhaid i hyn fod yn rhan o brosiect ehangach i wella’r sector iechyd a gofal yn ddramatig fel cyflogwr, fel bod chwarae teg yn cael ei roi i bob gweithiwr.”