Mae teulu wedi talu teyrnged i ddyn o Lanbed, a fu farw ar ôl cael ei ymosod arno gan gŵn yn ei gartref yr wythnos ddiwethaf.
Roedd yr heddlu wedi cael eu galw i dŷ yn Pleasant Hill, yn dilyn adroddiadau bod tri chi wedi ymosod ar John William Jones, 68, a fu farw yn y fan a’r lle.
Yn ddiweddarach, cafodd dynes ei harestio ar amheuaeth o fod yn rhan o’r digwyddiad, ond cafodd hi ei rhyddhau o’r ddalfa tra bod yr heddlu yn cynnal ymholiadau pellach.
Fe gafodd y tri chi tarw Prydeinig a oedd yn rhan o’r ymosodiad eu tywys o’r eiddo gan yr heddlu.
‘Bydd colled fawr ar ôl William’
Dywed aelodau o’i deulu – ei frawd Tomos Jones a’i nith Rhiannon Evans – fod William, fel yr oedd yn cael ei adnabod, yn “fab cariadus, a’n frawd a brawd-yng-nghyfraith perffaith”.
“Roedd ei ewythr, ei neiaint a’i nithoedd yn ei garu’n fawr iawn,” medden nhw.
“Dros y blynyddoedd, roedd William wedi mynychu canolfan ofal i oedolion yn Felinfach, cyn symud i Ganolfan Gymunedol Padarn yn Aberystwyth.
“Roedd William yn gefnogwr brwd o Lerpwl, yn ffan o rygbi Cymru ac roedd ganddo lygad dda am jig-sos.
“Bydd colled fawr ar ôl William gan ei deulu a’r sawl ffrind oedd wedi ei adnabod dros y blynyddoedd.”
