Comisiynydd Heddlu’n ymddiswyddo’n dilyn sylwadau ynghylch llofruddiaeth Sarah Everard

Mae Comisiynydd Heddlu Gogledd Swydd Efrog wedi ymddiswyddo ar ôl cael ei feirniadu am sylwadau ynghylch llofruddiaeth Sarah Everard.

Wrth ymddiswyddo, dywedodd Philip Allott ei fod eisiau “adfer hyder yn y swyddfa”, gan ymddiheuro’n “ddiamod” am ei sylwadau.

Cafodd y Comisiynydd ei gyhuddo o roi bai ar y dioddefwr, ar ôl iddo ddweud y dylai menywod fod yn fwy “streetwise” ynglŷn â phwerau arestio’r heddlu.

Dywedodd Philip Allott, na ddylai Sarah Everard fod wedi “derbyn” cael ei ‘harestio’ gan Wayne Couzens, a wnaeth gymryd arna ei fod yn ei harestio er mwyn ei herwgipio, ei threisio a’i llofruddio.

Arweiniodd ei sylwadau at alwadau y dylai ymddiswyddo, gan gynnwys galwadau gan gyn-Gomisiynydd Heddlu Gogledd Cymru, Arfon Jones.

Anhygoel

Mewn llythyr agored dywedodd nad oedd y sylwadau’n “adlewyrchu ei farn”, a’i fod wedi “cam-siarad”.

Yn y llythyr, dywedodd ei fod yn gwneud “y peth parchus”, yn dilyn cyfarfod gyda Phanel Trosedd a Thân Gogledd Swydd Efrog fore heddiw (14 Hydref).

Fe wnaeth y panel basio pleidlais o ddiffyg hyder ynddo i barhau yn ei rôl.

“Yn dilyn cyfarfod y Panel Heddlu a Throsedd heddiw mae’n amlwg i mi y byddai’r dasg yn arbennig o anodd, os yw hi’n bosib o gwbl,” meddai Philip Allott wrth drafod parhau â’i rôl.

“Byddai’n cymryd amser hir a lot o adnoddau gan fy swyddfa a’r grwpiau niferus sy’n gwneud gwaith anhygoel yn cefnogi menywod.

“Mae hwn yn amser sydd gan ddioddefwyr ddim mohono.

“Mae yna fenywod a merched yn Efrog a Gogledd Efrog yn dioddef yn sgil dynion heddiw.

Gwahaniaeth

“Mae angen i ddioddefwyr a grwpiau sy’n eu cefnogi nhw gael eu clywed.

“Ni allen nhw cael eu clywed os yw trafodaethau am fy nyfodol yn llenwi’r lle.

“Dyna pam fy mod i’n gwneud y peth parchus ac yn ymddiswyddo fel Comisiynydd Heddlu, Tân a Throsedd – er mwyn adfer hyder yn y swyddfa, a fydd bron yn amhosib i mi ei wneud, er mwyn caniatáu i leisiau dioddefwyr gael eu clywed yn glir heb gael eu hamharu gan yr helynt parhaus o’m cwmpas i.

“Fe wnes i ddod yn rhan o fywyd cyhoeddus oherwydd fy mod i eisiau gwneud gwahaniaeth. Dw i dal eisiau. Felly, dw i’n ymroi fy hun i wneud popeth allai fel unigolyn preifat i gefnogi grwpiau cefnogi dioddefwyr.

“Roedd yr addewid wnes i fel Comisiynydd Heddlu, Tân a Throsedd yn un gwir. Mae’n un y byddaf yn ei gadw.”