Mae Plaid Cymru wedi cadarnhau wrth golwg360 y byddan nhw’n cyflwyno enw eu harweinydd Rhun ap Iorwerth i fod yn Brif Weinidog nesaf Cymru.
Daw hyn wrth i Mark Drakeford gamu o’r neilltu yr wythnos hon.
Vaughan Gething sydd wedi ennill ras arweinyddol Llafur Cymru, gan guro Jeremy Miles, ac mae disgwyl y bydd ei benodiad yn cael ei gadarnhau yn dilyn pleidlais yn y Senedd.
Ond fel rhan o’r broses honno, mae modd i’r gwrthbleidiau gyflwyno’u hymgeiswyr eu hunain hefyd.
Mae gan Lafur fwyafrif o un yn y Senedd ar hyn o bryd, yn dilyn gwaharddiad Rhys ab Owen o Blaid Cymru.
‘Cwestiynau difrifol’
Yn ôl Plaid Cymru, mae “cwestiynau difrifol” ynghylch “barn a thryloywder” Vaughan Gething, y darpar Brif Weinidog.
Daeth i’r amlwg fod ei ymgyrch arweinyddol wedi derbyn £200,000 yn rhodd gan gwmni sy’n cael ei redeg gan ddyn gafwyd yn euog ddwywaith o droseddau amgylcheddol.
Mae Vaughan Gething yn gwadu ei fod e wedi gwneud unrhyw beth o’i le, er bod pwysau arno i ddychwelyd yr arian.
Ac fe ddaeth e dan y lach unwaith eto dros y penwythnos yn dilyn sylwadau sarhaus honedig am newyddiadurwyr wrth siarad â Teleri Glyn Jones o’r BBC.
“Bydd Plaid Cymru yn enwebu Rhun ap Iorwerth yn y bleidlais i ethol Prif Weinidog newydd Cymru yfory,” meddai llefarydd ar ran y Blaid.
“Mae’r mathemateg yn mynnu y bydd Vaughan Gething yn sicrhau pleidlais fwyafrifol, ond yn yr hinsawdd wleidyddol sydd ohoni, mae cwestiynau difrifol am farn a thryloywder yn gofyn am ystyried ymgeiswyr amgen.”
