Mae Adam Price, arweinydd Plaid Cymru, yn dweud y dylai unrhyw benderfyniad ynghylch arwisgo Tywysog newydd Cymru gael ei wneud yng Nghymru.
Daw ei sylwadau wedi i dros 20,000 o bobl arwyddo deiseb yn gwrthwynebu trosglwyddo’r teitl i’r Tywysog William.
Yn wreiddiol, dywedodd Adam Price y byddai “amser” yn y dyfodol i gael dadl gyhoeddus ynghylch y teitl, gan fod meddyliau Plaid Cymru “gyda’r Teulu Brenhinol wrth iddyn nhw alaru”.
Ond mewn sylwadau gafodd eu gwneud ar Radio Cymru, dywedodd fod trafodaethau ynglŷn â lle y dylai’r Arwisgiad ddigwydd yn y cyfryngau wedi “croesi llinell”.
Daeth ei sylwadau wedi i’r Prif Weinidog Mark Drakeford ddweud nad oes “dim brys” i gynnal Arwisgiad arall ac y dylai trafodaeth gael ei chynnal yn y cyfamser.
“Rwy’n croesawu’r hyn oedd gan y Prif Weinidog, Mark Drakeford, i’w ddweud ar y cwestiwn o Arwisgiad,” meddai Adam Price.
“Dw i wedi gweld straeon yn y wasg yn Llundain bod arwisgiad yn mynd i ddigwydd, a dw i’n meddwl bod llinell yn cael ei chroesi oherwydd mae hynny’n rhoi statws led-swyddogol i Dywysog Cymru ym mywyd Cymru.
“Dw i’n meddwl bod hynny’n benderfyniad y dylen ni yng Nghymru ei wneud mewn cyfnod lle rydyn ni’n byw mewn Cymru ddemocrataidd fodern – mae’n benderfyniad y mae angen i ni ei wneud yma cyn i unrhyw gyhoeddiad gael ei wneud.”
‘Sensitifrwydd a phoen’
Ychwanega Adam Price na ddylid brysio i wneud penderfyniad, ond ei fod yn un i Aelodau o’r Senedd ei wneud.
“Rwy’n weriniaethwr, ac mae sensitifrwydd a phoen o gwmpas teitl [Tywysog Cymru] i nifer ohonom,” meddai.
“Ond mae gan eraill farn wahanol ac mae angen trafodaeth ar y mater.”
