Mae Jane Dodds, arweinydd y Democratiaid Rhyddfrydol yn dweud bod y Ceidwadwyr Cymreig “am barhau allan o gysylltiad â phobol Cymru”.
Daw ei sylwadau ar ôl i bob Aelod Seneddol Cymreig o’r blaid gefnogi Boris Johnson, Prif Weinidog y Deyrnas Unedig, wrth iddo wynebu pleidlais o hyder yn ei arweinyddiaeth neithiwr (nos Lun, Mehefin 6).
Pleidleisiodd pob un o’r 359 o Aelodau Seneddol yn San Steffan, a phan gafodd y canlyniad ei gyhoeddi gan Syr Graham Brady, cadeirydd Pwyllgor 1922, fe ddaeth i’r amlwg fod 211 wedi dangos ffydd yn eu harweinydd, tra bod 148 yn ei wrthwynebu.
Pe bai e wedi colli’r bleidlais, fe fyddai ras arweinyddol wedi’i chynnal.
Mae lle i gredu bod pob Aelod Seneddol Ceidwadol yng Nghymru wedi ei gefnogi.
‘Plaid Geidwadol ranedig yn cynnal Boris Johnson’
“Mae’r sefyllfa’n gliriach nag erioed o’r blaen, fod Plaid Geidwadol ranedig yn cynnal Boris Johnson heb unrhyw gynllun i fynd i’r afael â’r materion sy’n wynebu’r cyhoedd yng Nghymru,” meddai Jane Dodds.
“Mae’n dal i fod yn un rheol iddyn nhw a rheol arall i’r gweddill ohonom.
“Mae Boris Johnson yn gelwyddgi ac yn droseddwr nad yw’n ffit i aros yn Brif Weinidog am eiliad yn rhagor.
“Mae Ceidwadwyr bore oes wedi’u ffieiddio ac yn parhau i droi tuag at y Democratiaid Rhyddfrydol y maen nhw’n gwybod y byddan nhw’n gweithio’n galed ac yn canolbwyntio ar yr hyn sy’n bwysig.
“Ar hyn o bryd, mae’n ymddangos bod Aelodau Seneddol y Ceidwadwyr Cymreig am barhau allan o gysylltiad â phobol Cymru.”
Boris Johnson wedi ennill pleidlais o hyder
“Mae’n bryd symud y prif weinidog anonest hwn o’i swydd”
