Cafodd dyn wnaeth ddisgyn ac anafu ei hun mewn ogof ym Mannau Brycheiniog ei gludo i Ysbyty Treforys Abertawe neithiwr (nos Lun, 8 Tachwedd).
Nid yw ei anafiadau’n bygwth ei fywyd, ond credir ei fod wedi anafu ei ên, ei goes yn ogystal â’i gefn.
Fe ddigwyddodd y ddamwain ddau ddiwrnod yn ôl wrth i’r dyn fynd i Ogof Ffynnon Ddu ger Penwyllt yn ardal Ystradgynlais ddydd Sadwrn (Tachwedd 6).
Sbardunodd hynny ymgyrch achub 54 awr, gydag oddeutu 70 o wirfoddolwyr yn helpu â’r ymdrech i’w achub.
“Mwy peryglus eistedd ar y soffa”
Mae’n debyg bod y dyn yn ogofawr profiadol. Dywedodd Steve Thomas, o Dîm Achub Ogof De a Chanolbarth Cymru: “Rydyn ni’n ymwybodol iawn o’r amgylchedd rydyn ni’n ei fwynhau, dyw e ddim yn beth di-hid i’w wneud,” meddai wrth BBC Breakfast.
“Dyw e ddim yn fwy peryglus na dim byd arall.
“I fod yn onest dw i’n meddwl ei bod hi’n fwy peryglus eistedd ar y soffa yn gwylio’r teledu.”
240 o bobol
Roedd dros 240 o bobol yn rhan o’r gwaith achub, gan gynnwys o leiaf wyth tîm achub ogofâu o bob cwr o’r Deyrnas Unedig.
Gweithiodd timau o achubwyr mewn shifftiau i achub y dyn ond nid oeddent yn gallu ei gludo i’r ysbyty mewn hofrennydd oherwydd y tywydd.
Mae’r ogofâu sydd ger Penwyllt yn 300 metr o ddyfnder – y dyfnaf yn y Deyrnas Unedig.
