Mae plaid UKIP wedi addo cynnal refferendwm er mwyn diddymu’r Senedd petaen nhw’n dod i rym ar ôl yr etholiad ym mis Mai.

Fel rhan o’u maniffesto, maen nhw hefyd yn ymrwymo i gael gwared ar fesurau sy’n helpu ffoaduriaid a cheiswyr lloches, ac am adfer yr economi yng Nghymru.

Enillodd y blaid saith sedd yn yr etholiad diwethaf, ond dim ond Neil Hamilton, arweinydd y grŵp, sydd dal yn cynrychioli’r blaid.

Bydd y maniffesto yn cael ei lansio ar Facebook fore heddiw (dydd Mawrth, Ebrill 13).

Mae UKIP yn dweud y bydden nhw’n cynnal refferendwm ar ddiddymu’r Senedd “yn syth” o fewn tymor nesaf y Senedd.

Yn ei lle, byddai UKIP am weld aelodau yn cael eu hethol i fyrddau iechyd a datblygu ysgolion gramadeg ac ysgolion sy’n cael eu hariannu gan y llywodraeth fyddai’n “hunanreoli”.

Eisoes, mae’r Ceidwadwyr Cymreig wedi dweud na fydden nhw’n clymbleidio ag unrhyw blaid sy’n cefnogi diddymu’r Senedd.

Mae maniffesto UKIP yn addo cael gwared ar gynllun Llywodraeth Cymru i gefnogi ceiswyr lloches a ffoaduriaid.

Er nad yw mewnfudo wedi’i ddatganoli i Gymru, mae Llywodraeth Cymru wedi addo helpu ffoaduriaid i ddod yn rhan o’r gymuned a chael mynediad at wasanaethau iechyd.

Yn ogystal, mae’r blaid yn ymrwymo i stopio ymchwiliad Llywodraeth Cymru i gerfluniau ac enwau strydoedd, ymchwiliad sydd wedi darganfod fod 209 o strydoedd, adeiladu, lluniau, a chofebau yn coffáu pobol oedd yn ymwneud yn uniongyrchol â chaethwasiaeth i’w gweld yng Nghymru.

Wrth edrych ar yr economi, mae UKIP yn dweud y bydden nhw’n rhewi cyfraddau busnes am 12 mis, a chreu cronfa adnewyddu gwerth £100m ar gyfer y diwydiant twristiaeth.

Mae rhai o’u polisïau eraill yn cynnwys:

  • Cael gwared ar ddeddfau sy’n gorfodi cynghorau lleol i gynnig gwasanaethau yn Gymraeg a Saesneg.
  • Diddymu hawliau dinasyddion tramor i bleidleisio.
  • Caniatáu i rieni ddweud nad yw eu plant am fynychu gwersi Cymraeg ar ôl iddyn nhw droi’n 14 oed.
  • Cael gwared ar y ddeddf sy’n gwahardd rhieni rhag taro eu plant.

“Bargen wych i wleidyddion, ond un wael i Gymru”

“Fe wnaeth y Cynulliad Cymreig, nawr y Senedd, addo cymaint i bobol Cymru,” meddai Dr Felix Aubel, ymgeisydd UKIP yn y gogledd.

“Ychydig iawn mae hi wedi’i gwneud, ac mae hi’n ceisio gwahanu Cymru oddi wrth y Deyrnas Unedig.

“Mae UKIP yn galw am ddiddymu’r Senedd, mae Cymru’n dymuno gweld dyfodol llwyddiannus tu hwnt i ddatganoli.”

‘Pobol, nid gwleidyddion, sy’n gwybod beth sydd orau’

“Mae UKIP yn credu mai pobol, nid gwleidyddion, sy’n gwybod beth sydd orau,” meddai Neil Hamilton, arweinydd y blaid yng Nghymru.

“Mae Cymru wedi dioddef ugain mlynedd o’r Cynulliad, y Senedd, ac mae Cymru’n mynd am yn ôl ym mhob ffordd sy’n bosib i’w mesur.

“Bu’n fargen wych i wleidyddion, ond yn un wael i Gymru.”